Një nënë 38-vjeçare me komplikacione në zemër ka shpëtuar për mrekulli bashkë me fëmijën e saj, falë ndërhyrjes në kohë dhe punës së shkëlqyer të bërë nga ekipi mjekësor dhe ai infermieror në Maternitetin “Mbretëresha Geraldinë” në kryeqytet.
Në sajë të bashkëpunimit të mjekëve obstetër-gjinekologë, kardiologë dhe reanimatorë, 38-vjeçarja që u operua me sukses nga ekipi me Dr. Zef Delia, Dr. Lorenc Buzo, Dr. Fatmir Kopani, Dr. Albert Cakani, infermieret Klea Fraholli dhe Eranda Tore dhe fatmirësisht sot gëzon shëndet së bashku me të voglën e saj.
“Pacientja erdhi nga Shkodra para tetë ditësh, me gjendje relativisht të rëndë shëndetësore, ishte gravidancë 37-38 javë, ishte post një ndërhyrje të rëndësishme që ishte bërë në zemër para 19 vitesh. Vetë situata në të cilën prej kohësh trajtohej për problemet e zemrës, plus shtatzënia, e agravoi gjendjen e nënës, për të cilën Spitali i Shkodrës e solli në Tiranë, për një trajtim më të specializuar. Pacientja u fut në sallë në kushtet e një urgjence dhe në sajë të përpjekjeve dhe masave të gjithë spitalit me mjekë reanimatorë, pediatër, obstetër gjinekologë, dhe stafit infermieror, nëna lindi një bebe që gëzon shëndet të mirë. Situata e saj shëndetësore ka ardhur në përmirësim ku ajo ka dalë nga rreziku për jetën”, bën më dije Dr. Zef Delia.
“Ky ka qenë një rast në vëzhgim të rreptë mjekësor në kushtet e reanimacionit. Është ndërruar lloji i antikoagulimit në mënyrë që ne të ishim të gatshëm që para çdo urgjence, ta ndërprisnim antikoagulimin dhe të bënim të mundur kryerjen e operacionit, pasi ne nuk e dinim kur kjo mund të kryhej. Pacienti pati disa probleme vështirësi në frymëmarrje. Ne gjetëm kohën më të mirë që ta intervenojmë dhe në fund besoj që kemi bërë një punë të suksesshme, sepse pacientja dhe bebja gëzojnë shëndet të mirë”, shprehet doktori Lorenc Buzo.
p.k\dita
