Pionieri i lajmeve të transmetimeve televizive në SHBA dhe themeluesi i CNN, Ted Turner, ka ndërruar jetë, njoftoi të mërkurën kanali kabllor i lajmeve.
Turner themeloi CNN në vitin 1980 dhe revolucionarizoi mënyrën se si konsumoheshin lajmet në SHBA dhe në botë duke krijuar sistemin e lajmeve të fundit 24 orë në ditë, i cili riformësoi industrinë televizive në fund të shekullit të 20-të.
I lindur në Ohio, ai themeloi perandorinë e tij mediatike në Atlanta të Xhorxhias dhe, pasi ia shiti CNN-në Time Warner, u bë një nga udhëheqësit më të shquar të biznesit dhe filantropët e epokës së tij. Ai investoi në ekipe sportive, mbështeti restaurimin e habitateve në Perëndimin malor amerikan dhe dhuroi 1 miliard dollarë (rreth 850 milionë euro) për bamirësitë e Kombeve të Bashkuara, ndër shumë arritjet e tij.
Nuk u dha asnjë shkak i vdekjes, por Turner luftonte me demencën me trupa Lewy, një sëmundje neurodegjenerative pak e njohur, që nga viti 2018.
Presidenti i SHBA-së, Donald Trump, vlerësoi trashëgiminë e Turner në kohën e ndarjes së tij nga jeta.
“Ted Turner, një nga Më të Mëdhenjtë e të Gjitha Kohërave, sapo vdiq”, tha Trump në platformën e tij Truth Social. “Një nga Më të Mëdhenjtë e Historisë së Transmetimeve dhe një mik i imi. Sa herë që kisha nevojë për të, ai ishte aty, gjithmonë i gatshëm të luftonte për një kauzë të mirë!”
Ringjallja e një biznesi familjar në prag të dështimit
I lindur në Cincinnati, Robert Edward “Ted” Turner III nuk e përfundoi kurrë karrierën e tij universitare në Universitetin Brown, pasi u përjashtua para se të diplomohej.
Ai vazhdoi të merrte përsipër biznesin familjar të reklamave pasi babai i tij i mori jetën vetes për shkak të problemeve financiare.
Turner bleu fillimisht një numër stacionesh radiofonike përpara se të blinte një stacion lajmesh në vështirësi në Atlanta në vitin 1970, përpjekja e tij e parë në televizion.
I prekur nga zhgënjimi i pamundësisë për të parë programet televizive të lajmeve, të cilat ishin në orën 8:00 të mbrëmjes kur ai nuk ishte ende në shtëpi nga puna dhe në orën 11:00 të mbrëmjes kur ai ishte tashmë në shtrat, ai lançoi CNN-in, i cili transmetonte vetëm lajme, 24 orë në ditë.
“Do të më duhej të godisja fort dhe të lëvizja tepër shpejt dhe kjo është ajo që bëmë — të lëviznim aq shpejt sa rrjetet [e transmetimit] nuk do të kishin kohë të reagonin, sepse duhet ta kishin bërë ata këtë, jo unë”, tha Turner për këtë moment, në një intervistë të vitit 2016 me Akademinë e Arritjeve. “Por ata nuk kishin imagjinatën”, shtoi ai.
Ndërsa shumica e gazetarëve televizivë ikën nga Bagdadi, përpara një sulmi të afërt amerikan, CNN mbeti në vendngjarje dhe e transmetoi luftën drejtpërdrejt për publikun.
Rrjeti kapi imazhet e para drejtpërdrejt të shpërthimit të një lufte, me sisteme gjurmuese kundërajrore që fluturonin nëpër qiell dhe korrespondentët që dridheshin nga tronditja e bombave.
Suksesi i revolucionit të medias informative të rrjetit frymëzoi krijimin e kanaleve të tjera lajmesh 24-orëshe, duke përfshirë Fox News nga rivali i hershëm i Turner, Rupert Murdoch, MSNBC dhe rrjete të tjera të panumërta në të gjithë botën.
Perandoria televizive e Turner u zgjerua përtej CNN dhe përfshinte kanalet TBS dhe TNT për sport dhe argëtim, Turner Classic Movies dhe Cartoon Network, ndër të tjera.
DW
