Ndeshja kundër PSG-së ka qenë e fundit për Tomas Mylerin me fanellën e Bajernit. Veterani 35-vjeçar e ka mbyllur zyrtarisht me gjigantët e Bajern Mynihut.
Megjithatë, dëmtimi i rëndë i Musialës ka hapur skenarë të rinj në Mynih. Madje, ka nga ata që mendojnë se Bajerni duhet t’i ofrojë një kontratë të përkohshme veteranit Tomas Myler. Ky është mendimi i Lotar Mateus. Eksperti i “Sky” foli me “Bild” rreth situatës së Musialës dhe sugjeroi që Mylerit t’i jepej një kontratë tjetër afatshkurtër.
“Në këtë situatë, Bajerni duhet të shqyrtojë nëse Tomas Mylerit duhet t’i jepet një kontratë tjetër gjashtëmujore. Sezoni në SHBA sapo ka filluar atëherë, dhe ndërkohë, ai mund të jetë një ndihmë e madhe për Bajernin. Bajerni bëri diçka të ngjashme me mua kur u transferova te Nju Jork Metro Stars. Tifozët me siguri do të ishin të lumtur gjithashtu”.
Turneu në Atlanta supozohej të ishte fundi i sezonit— pas 25 vitesh te Bajerni, Thomas Myler ishte planifikuar të largohej. Por nëse Mateus ia del mbanë, ikona e klubit do të vazhdojë të luajë në “Allianz Arena”.
