Për të mos rrezikuar largimin nga skema e trajtimit me ndihmë ekonomike, çdo përfitues duhet të paraqitet në afatin e përcaktuar për të plotësuar deklaratën, mbi çdo ndryshim të situatës së tyre social ekonomike.
Për të gjitha familjet përfituese është e detyrueshme paraqitja çdo 3 muaj tek zyra e administratorit shoqëror, i cili plotëson deklaratën social-ekonomike dhe e hedh në sistem, si dhe verifikon gjendjen shoqërore dhe ekonomike të familjeve në nevojë, kur futen për herë të parë në skemë, si dhe dy herë në vit për të gjitha familjet që përfitojnë ndihmë ekonomike.
“Mosparaqitja një herë në 3 muaj dhe moslejimi i verifikimit social-ekonomik në familje largon familjen nga skema e ndihmës ekonomike”, bëjnë me dije autoritetet e Shërbimit Social Shtetëror.
Pagesa e Ndihmës Ekonomike tërhiqet dhe merret në dorëzim nga gruaja e familjes në nevojë dhe nga vetë individi në nevojë pranë zyrave të postës ose sporteleve të bankave.
Skema e Ndihmës Ekonomike është shtylla kryesore e programit të mbrojtjes sociale e cila synon zbutjen dhe lehtësimin e varfërisë, duke siguruar pagesa dhe mbështetjen e familjeve dhe individëve më në nevojë, për të dalë nga varfëria dhe për të gjetur mundësitë e riintegrimit social dhe ekonomik.
p.k\dita
