Përfundon rindërtimi i një tjetër qendre shëndetësore. Kësaj here bëhet fjalë për qendrën shëndetësore të Libohovës, në të cilën do të mund të marrin shërbime mjekësore me standarde më të mira rreth 5500 banorë të kësaj zone.
Teksa ka ndjekur nga afër ofrimin e shërbimeve mjekësore në këtë qendër, ministrja e Shëndetësisë dhe Mbrojtjes Sociale, Ogerta Manastirli, ka bërë me dije se përmirësimi i infrastrukturës në qendrat e kujdesit parësor do të vijojë në të gjithë vendin. Kështu, qytetarëve nuk u duhet të udhëtojnë drejt qyteteve apo zonave të tjera, për të marrë shërbimet e duhura të kujdesit parësor.
Duke konfirmuar vijimësinë e programit të rimbursimit të fishave të diabetit edhe për të moshuarit mbi 65 vjeç në këtë zonë, ministrja është ndalur edhe tek programi i ri i vaksinimit falas kundër HPV për vajzat 13-vjeçare. Ky program që po zbatohet në të gjithë vendin, synon që nëpërmjet vaksinimit të vajzave të kësaj grupmoshe, në të ardhmen të parandalohet shfaqja e kancerit të qafës së mitrës. Sipas ekspertëve të shëndetit, kjo është një ndër vaksinat shumë efektive, gati 100 për qind efektive përsa i përket të gjitha problematikave dhe mbi të gjitha luftës kundër humpan papilloma virusit, e cila shkakton dhe kancerin e qafës së mitrës.
p.k\dita
