Detaje të reja nga plagosja me thikë pas sherrit, në një lokal në Laprakë të Tiranës, e ndodhur një orë më parë. Tre persona mbetën të plagosur, nga të cilët më rëndë dhe në gjendje kritike në spital, vjehrri i biznesmenit italian, 64 vjeç.
Autor i krimit është identifikuar 40-vjeçari Elton Mërgjyshi, ish-punonjës i shkarkuar, që dyshohet se ka goditur me mjet prerës Viktor Rrapollarin, 64 vjeç, vajzën e tij Roxhersa Rrapollari, 40 vjeçe dhe bashkëshortin e saj Masimo Sorvilo, 47 vjeç, shtetas italian, ish-pronar i tij.
Ky i fundit ka një kompani në të cilin ka qenë i punësuar 40-vjeçari. Shkak për sulmin dyshohet se është bërë hakmarrja për shkarkimin nga puna. Si pasojë, 3 shtetasit janë dëmtuar dhe ndodhen në spital, nën kujdesin e mjekëve.
Në gjendje kritike është 64-vjeçari, i cili ndodhet në intubim, për shkak të goditjes me thikë në zemër dhe mjekët po bëjnë çdo përpjekje për ta mbajtur në jetë. Shërbimet e Policisë po kontrollojnë në zonë për kapjen e autorit. Grupi hetimor po punon për sqarimin e rrethanave të ngjarjes.
