Ka dështuar seanca e parë në themel për gjyqin e dosjes së inceneratorit të Fierit, ku një nga shkaqet ishte mungesa e avokatit të Arenc Myrtezanit, pronar i një kompanie fiktive sipas SPAK, që ndodhet në kërkim. Gjithashtu, Gjykata e Posaçme evidentoi problematika ne njoftimin e subjekteve të akuzuara që po gjykohen ne ketë proces. Seanca e radhës u caktua më datë 2 maj, në orën 10:10. Më 24 mars Gjykata e Posaçme kaloi për gjykim për ndërtimin e Inceneratorit të Fierit, ku janë marrë të pandehur ish-ministri i mjedisit Lefter Koka, ish-deputeti Alqi Bllako, të dy edhe te inceneratori i Elbasanit, si dhe revizori i punimeve Arben Dervishaj, nënpresident i FSHF-së, dhe disa zyrtarë e biznesmenë të tjerë. Prokurorja Flojera Davidhi disa javë më parë i kërkoi prokurorisë që të ndryshojë akuzën për ish-sekretarin e Ministrisë së Mjedisit, Alqi Bllako, si dhe për Arben Dervishaj, nga ajo e korrupsionit të zyrtarëve të lartë shtetërorë, në korrupsion të zyrtarëve publikë, duke lehtësuar pozitat juridike të tyre. E njëjta akuzë u ndryshua edhe për biznesmenin Klodian Zoto, ndërsa ngelën të pandryshuara akuzat e tjera; të pastrimit të parave, mashtrimit me pasoja të rënda dhe krijimi i skemave fiktive. Edhe për dy administratorë të kompanive, shtetasin Giuseppe Ciafaglione dhe Arjola Kodra, që kryen punime për inceneratorin e Fierit, u ndryshua akuza nga ajo e korrupsionit aktiv të zyrtarëve të lartë shtetërorë, në korrupsion aktiv të zyrtarëve publikë. Tetë personat e marrë të pandehur, përfshi edhe ish-ministrin Lefter Koka dhe ish-deputetin Alqi Bllako, i kërkuan gjykatës që procesi ndaj tyre të zhvillohet me gjykim të shkurtuar. Pritej që në seancën e parë të themelit, gjykata të vendoste nëse do të pranohet kjo kërkesë, por ajo dështoi. Ndërkohë, togat e zeza pushuan akuzën për Robert Shabanin, pasi rezulton se është gjykuar njëherë për këtë akuzë dhe ishte dënuar nga Gjykata e Apelit të Tiranës. Sipas akuzave të SPAK për inceneratorin e Fierit u paguan 4 milionë euro për punë që nuk u kryen asnjëherë, ndërsa 60 milionë lekë është dëmi i shkaktuar në buxhetin e shtetit në skemën e mashtrimit.
Nis me shtyrje edhe gjyqi për inceneratorin e Fierit, mungoi avokati i biznesmenit në kërkim
