Nis puna në Spitalin e ri Qendror të QSUT-së. Dhënia e kujdesit të specializuar mjekësor ka nisur tashmë në shtatë shërbimet e para, për të cilat ka përfunduar plotësisht transferimi i pacientëve dhe aparaturave në ambientet e reja të spitalit. Sipas autoriteteve të shëndetësisë, puna ka nisur në shërbimin e endokrinologjisë, hematologjisë, gastrohepatologjisë, nefrologjisë, dhe sëmundjeve të tjera interne. Ndërkohë që brenda një kohe të shkurtër do të përfundojë edhe vënia në punë e shërbimit polivalent të urgjencës, kardiologjisë, kardiokirurgjisë dhe shërbimeve të tjera për të cilat po vijon puna për transferimin.
Ministrja e Shëndetësisë dhe Mbrojtjes Sociale, Ogerta Manastirliu, ka vizituar nga afër pacientët e pare dhe stafet mjekësore të shërbimeve të transferuara në spitalin e ri.
“Jemi të kënaqur që plani i transferimit është duke shkuar ashtu sikurse ne e kemi planifikuar, duke garantuar që shërbimet të transferohen nga pikëpamja e organizimit ndërspitalor, por edhe organizmit mes shërbimeve të ketë efektivitet maksimal. Shtatë shërbime janë transferuar. Kjo është faza e parë, puna po vijon për t’u transferuar edhe shërbimet e tjera, sikurse ëshhtë shërbimi i kardiologjisë, reanimacionit kardiak dhe urgjenca”, vuri në dukje ministrja Manastirliu.
Spitali Qendror është vepra më e madhe infrastrukturore në shëndetësi në 30 vitet e fundit. Spitali Qendror ka kapacitet 345 shtretër dhe do të akomodohen 14 shërbime mjekësore spitalore të specializuara nga kardiologjia, nefrologjia, hematologjia, gastrohepatologjia, mjekësia interne, endokrinologjia, dermatologjia, reumatologjia, alergologjia, urgjenca dhe imazheria.
Pesë vite më parë nisi zbatimi i masterplanit për modernizimin e QSUT dhe pas përfundimit të Spitalit Kirurgjikal “Frederik Shiroka”, Spitalit të ri Pediatrik, Spitalit Infektiv, Depos Farmaceutike QSUT dhe Spitalit Qendror, vijon puna me intensitet për fazën e dytë të rindërtimit të Spitalit Pediatrik, në vijim do të hapen investime të reja me projektet për rehabilitimin e Spitalit të Kardiokirurgjisë, Spitalit Psikiatrik dhe atij të Djegje-Plastikës në QSUT.
p.k\dita
