Nisi sot regjistrimi për fituesit që janë përzgjedhur për të ndjekur programet e specializimit afatgjatë në mjekësi për vitin akademik 2022-2023.
Autoritetet e Fakultetit të Mjekësisë kanë konfirmuar afatet dhe dokumentet që duhet të dorëzojnë për regjistrim, të gjithë kandidatët që janë shpallur fitues për kuotat e reja të pranimeve në ciklin e tretë të studimeve në programet e specializimit.
Dy javë është afati i përcaktuar për konfirmimin e procedurave të regjistrimit si fitues në programin e përzgjedhur nga secili kandidat.
“Për të gjithë kandidatët fitues për specializimet afatgjata për vitin akademik 2022-2023, bëhet me dije se regjistrimet do të kryhen pranë sekretarisë mësimore të Fakultetit të Mjekësisë në datat 12-24 prill nga ora 9:00-14:00. Kandidatët me kontratë, duhet të dorëzojnë kontratën e nënshkruar me ministritë brenda 2 javëve”, sqarohet nga Fakulteti i Mjekësisë.
Përzgjedhja e programeve të studimit nga të gjithë kandidatët fitues është bërë një ditë më parë.
Dokumentacioni që do të duhet të paraqesin e fituesit e specializimit në momentin e regjistrimit përfshin:
- Fotokopje të ID ose pasaporte.
- Certifikatë të statusit civil.
- Fotokopje e noterizuar e diplomës dhe notave të shkollës së mesme.
- Kontrata e lidhur me Ministrinë përkatëse (kuotat e mbuluara).
- Një fotografi me përmasat 2.x2.Scm.
- Mandat pagesa e tarifës së shkollimit.
- Kandidatët me kontratë, duhet të dorëzojnë kontratën e nënshkruar me ministritë brenda 2 javëve.
p.k\dita
