Kryeministri Edi Rama së bashku me homologun e tij të Maqedonisë së Veriut, Dimitar Kovacevski janë ditën e sotme në pikën kufitare të Qafë Thanës, ku nga sot “zhbëhet” kufiri mes dy shteteve.
Një vendim që lehtëson qarkullimin e njerëzve dhe mallrave me procedura shumë të thjeshtuara.
Kjo është një ndër nismat rajonale që lehtëson lëvizjen në Ballkan.
Maqedonia e Veriut dhe Shqipëria po punojnë për ndërtimin e korridorit 8 një vepër që përfshin një autostradë, e cila do të zhvilloje më tej marrëdhëniet ekonomike mes dy vendeve.
“Qafë Thanë – Hyn në fuqi programi i ri kufitar “Një ndalesë – Një kontroll”, duke “zhbërë” kufirin mes Shqipërisë dhe Maqedonisë së Veriut dhe lehtësuar qarkullimin e njerëzve dhe mallrave me procedura shumë të thjeshtuara”, shkruan Rama në një postim të bërë në Facebook.
Ndërsa Zv.kryeministrja Belinda Balluku deklaroi se ky projekt do të ndihmojë në lehtësimin e lëvizjes së qytetarëve në të dyja anët e kufirit dhe do stimulojë zhvillimin ekonomik rajonal.
“Ajo që i ka munduar shqiptarët ka qenë izolimi që dhe sot ka efektet e tij negative. Ndaj një nga prioritetet e qeverisë Rama që nga 2013 ka qenë lehtësimi i procedurave kufitare për kalimin e qytetarëve dhe për tregtinë dhe mallrat. Ky projekt është dëshmia e radhës e dëshirës së mirë mes dy qeverive, për të bashkëpunuar me njëri-tjetrin nga nivelet administrativ deri në nivelet më të larta politike. Marrëdhënia mes dy shteteve është kthyer në model për tu ndjekur.
Tashmë, ne kemi një përvojë të mirëfunksionimit të pikave të përbashkëta kufitare. Këto dy modele na kanë udhëhequr për të ardhur sot në këtë pikë të re kufitare, ku qytetarët do kenë mundësinë e një lëvizje të re komode.
Projekti synon përmirësimin e infrastrukturës dhe thjeshtimin e procedurave të kontrollit përmes “një ndalesë, një kontroll”.
Ky projekt do kenë ndikim në lehtësimin e lëvizjes në të dyja krahët e kufirit dhe do stimulojë zhvillimin ekonomik rajonal”, tha Balluku.
