Skuadra e Barcelonës jo vetëm po shkon drejt fitimit të kampionatit, por po thyen rekorde në një nga repartet më të dobëta të të gjithë historisë së klubit; mbrojtjen. Pas fitoes me rëndësi ndaj Atletico Madrid, duke i mposhtur kryeqytetasit minimalisht 1-0 në Camp Nou, e gjejnë veten plot 11 pikë para Real Madrid. Me tetë ndeshje të mbetura në kalendar, duket e vështirë që skuadra e trajnerit Xavi Hernandez të “rrëshkasë” dhe të “hedhë në erë” sezonin. Në këtë kampionat, katalanasit kanë dominuar dhe përveç titullit, kanë luksin që në javët e mbetura të kthejnë vëmendjen edhe nga rekordet që mund të mbërrijnë. Një i tillë është edhe ai i golave të pësuar. Reparti defensiv ka rezultuar hermetik dhe në 30 ndeshje të kampionatit, blaugranat kanë pësuar vetëm nëntë gola, duke u konfirmuar si mbrojtja më e mirë në katër kampionatet kryesorë të Europës. Barça dhe portieri gjerman Ter Shtegen, i cili thyeu edhe rekordin e ish-portierit Klaudio Bravo, po tek katalanasit, ia ka dalë me sukses që nga 30 ndeshje të La Ligas, 23 prej tyre t’i mbyllë pa pësuar gol. Tashmë, në tetë javët e mbetura, objektivi i Ter Stegen me shokë është të mos pësojnë më shumë se gjashtë gola, për t’u konfirmuar si mbrojtja më e mirë në histori. Nëse ia dalin me sukses, atëherë Xavi dhe të besuarit e tij do të thyenin rekordin e Jose Mourinhos me Chelsean. Në sezonin 2004/05, londinezët nën drejtimin e luzitanit pësuan vetëm 15 gola dhe ende sot e kësaj dite mbajnë rekordin historik. Por, Barça është shumë pranë vendosjes së një rekordi të ri dhe duke parë se skuadra e Xavit pëson mesatarisht një gol për tre ndeshje, i ka të gjitha shanset për t’ia dalë.
Kerko
