Kryeministri Edi Rama njoftoi të premten se ka propozuar Vlora Hysenin për postin e drejtoreshës së Shërbimit Informativ Shtetëror – një ish-drejtuese e shërbimit inteligjent të Kosovës.
“I paraqita Presidentit të Republikës propozimin për emërimin e Znj.Vlora Hyseni drejtore të Shërbimit Informativ të Shtetit, me besimin e plotë se përgatitja e spikatur, eksperienca e krijuar në vite dhe respekti që zonja Hyseni gëzon në komunitetin ndërkombëtar të inteligjencës, përbëjnë një garanci të plotë për reformimin e mëtejshëm të shërbimit inteligjent shqiptar,” njoftoi Rama.
Hyseni punon prej gati dy vitesh si këshilltare për sigurinë pranë zyrës së kryeministrit Rama, ndërsa më herët ka shërbyer në Kosovë si zv/drejtore dhe drejtore e komanduar e Agjencisë së Kosovës për Inteligjencë. Hyseni është larguar nga kjo detyrë në qershor të 2021.
SHISH ka mbetur pa drejtues prej muajit dhjetor kur drejtori i fundit i intitucionit, Helidon Bendo, u lirua nga detyra nga Presidenti Begaj dhe kryeministri Rama kaloi kompetencat e drejtimit tek zëvendësdrejtori Oljan Kanushi.
n.s. / dita
