Nga Fatos Tarifa
Është interesante të vëresh sa të përbashkëta kanë Edi Rama dhe Donald Trump.
1. Si njëri, ashtu edhe tjetri janë të dashuruar pas pushtetit. E duan pushtetin dhe, po të mundnin, nuk do të hiqnin kurrë dorë prej tij dhe prej privilegjeve që ai u siguron. Rama është aktualisht kryeministri më jetëgjatë në detyrë në Europë, ndërsa Trump ëndërron (dhe ndoshta do të përpiqet) të mbetet president edhe përtej kufizimeve që parashikon Kushtetuta amerikane.
2. Si njëri, ashtu edhe tjetri identifikohen me pushtetin. Në një kuptim real të fjalês, pushteti personifikohet tek ata, ose personalizohet prej tyre: Rama në Shqipëri dhe Trump në Shtetet e Bashkuara.
3. Të dy hynë në politikë nga jashtë saj dhe erdhën në pushtet përmes partive me të cilat nuk kishin lidhje të hershme. Rama iu bashkua Partisë Socialiste shumë vonë, ndërsa Trump u ngjit në krye të Partisë Republikane, megjithëse më parë kishte qenë i lidhur herë me demokratët, herë si i pavarur.
4. Si njëri, ashtu edhe tjetri e kanë vendosur veten mbi partitë që pretendojnë se përfaqësojnë dhe akuzohen se mbajnë përgjegjësi për krizën e këtyre partive: Rama për krizën e Partisë Socialiste dhe Trump për krizën e republikanëve amerikanë.
5. Si njëri, ashtu edhe tjetri shpesh shfaqin tipare të theksuara narciste. (Nuk jam profesionist për të pohuar nëse vuajnë nga një çrregullim narcistik i personalitetit).
6. Si njëri, ashtu edhe tjetri janë arrogantë: arrogantë në gjuhë, arrogantë në sjellje, arrogantë në marrëdhëniet me vartësit dhe bashkëpunëtorët, arrogantë ndaj publikut dhe shpesh arrogantë edhe në raport me personalitete të huaja.
7. Si njëri, ashtu edhe tjetri kanë marrëdhënie të vështira me mediat. Të dy i akuzojnë ato për shtrembërim të realitetit dhe për prodhim të “fake news”. Për Ramën, mediat janë shpesh një “kazan”; për Trumpin, ato janë “enemies of the people”.
8. Si njëri, ashtu edhe tjetri priren të bashkëpunojnë me njerëz që u janë besnikë atyre personalisht. Rama promovon në listat e kandidatëve për deputetë socialistë individë besnikë ndaj tij, edhe kur ata nuk kanë peshë politike apo kontribute të spikatura në Parti. Trump, nga ana e tij, ka mbështetur shpesh kandidatë republikanë që shfaqin besnikëri të fortë personale ndaj tij.
DITA
