Nga Orgen Peci
Lufta kundër “fake news” kërkon më shumë përgjegjësi nga gazetaria, përkrahje për drejtuesit profesionistë, si dhe lexim kritik nga ana e vetë qytetarëve përpara se të shpërndajnë “informacione” të tilla të paverifikuara.
Është hera e dytë brenda një kohe të shkurtër që në rrjetet sociale përhapet një valë desinformimi me tituj bombastikë që pretendojnë “shkarkimin ekskluziv” të Drejtorit të Përgjithshëm të Policisë së Shtetit. Megjithëse fare e lehtë të sqarohet që është lajm i rremë, fenomeni ngre pikëpyetje mbi synimet pas kësaj “gazetarie” të spekulimit.
Ndryshe nga paraardhësi i tij, Skënder Hitaj njihet si drejtues me integritet. Që nga nisja e detyrës, ai ka ndërmarrë hapa konkretë për të riafruar në strukturat drejtuese të Policisë së Shtetit profesionistë me përvojë. Është një përpjekje për të rikthyer besimin e lëkundur dhe standardet brenda radhëve të policisë.
Lajmet e fabrikuara synojnë të minojnë pikërisht këtë përpjekje.
Policia është kthyer në një sektor jashtëzakonisht të vështirë. Për shkak të rrethanave komplekse, krimit me mbështetje politike dhe sfidave në rritje të sigurisë, institucioni kërkon më shumë se kurrë një dorë të fortë. Forcimi nuk është e mundur të vijë pa një drejtim stabël. Në këtë kuadër, përhapja e këtyre “lajmeve” është një strategji e mirëmenduar. Edhe pse janë lehtësisht të verifikueshme, këto ‘raportime’ lënë pas perceptimin e luhatjes dhe instabilitetit brenda strukturave të zbatimit të ligjit.
Por përveçse si mjet trysnie ndaj atyre që kërkojnë të vendosin rregull në sektorë delikatë, situata duhet parë edhe në dy kënde të tjerë.
E para duhet të tërheqë vëmendjen e organizatave që mbikqyrin rregullat e gazetarisë dhe të raportimit. Kjo pasi, ky fenomen i përhapur në masë po e minon më tej besimin e publikut edhe te media.
E dyta, kjo situatë apelon për një lloj edukimi të publikut në kushtet e reja të fuqisë informuese, por edhe dezinformuese të rrjeteve sociale. Jo gjithçka që përhapet e lexohet në këto rrjete është e vërtetë, sado “bombastike” të duket. Koha që edhe lexuesi të kuptojë që duhen injoruar dhe nuk duhen përhapur.
DITA
