Në kuadër të përvjetorit të luftës në Ukrainë, në Tiranë po mbahet një marshim.
Qytetarë të shumtë janë nisur nga Bulevardi drejt Bashkisë së Tiranës.
Të pranishëm në marshim janë kryebashkiaku Veliaj, ambasadori ukrainas, ambasadorja Kim, ministrja Spiropali dhe figura të tjera të njohura.
Qytetarët po qëndrojnë para një monitori të vendosur para Bashkisë, ku me flamuj në duar po shohin pamjet që ka rezervuar një vit luftë në Ukrainë.
Një fjalim emocionues ka mbajtur ambasadori i Ukrainës në Tiranë, Volodymyr Shkurov, në aktivitetin që shënon një vjetorin e agresionit rus ndaj vendit të tij.
“E mbaj mend mirë 8 prillin e vitit të kaluar kur marshuam në një protestë masive. Mbaj mend që asnjë prej njerëzve të ndërgjegjshëm nuk e kishte menduar mundësinë e një lufte që vijon prej një viti.
Edhe nëse dikush kishte menduar se Ukraina do të binte brenda pak ditësh, kjo nuk ka ndodhur dhe nuk do ndodhë. Jam krenar të përfaqësoj Ukrainën dhe Ukrainasit. Ajo që kemi parë në këtë vit, tregon se ka jo vetëm një rritje të reflekseve kafshërore, por edhe një dëshirë për të shkatërruar popullin tonë.
Pushtuesit rusë janë fokusuar në shkallë të lartë në veprimet e tyre, mbrojtësit ukrainas kanë çliruar thuajse gjysmën e territorit të pushtuar. Ukraina tashmë është e mbuluar në gjak, por vijon të luftojë pa kushte për fitoren që beson.
Falenderoj Shqipërinë, për solidaritetin dhe mbështetjen ndaj popullit ukrainas, po ashtu edhe kryesimin e Shqipërisë në OKB, si edhe popullin shqiptar për ndihmën humanitare”, tha Shkurov, ndërsa në përfundim kërkoi një minut heshtje në kujtim të jetëve të humbura gjatë kësaj lufte të tmerrshme.
j.l./ dita