Ne anëtarët e Kryesisë së Komitetit Kombëtar të Organizatës së Veteranëve dhe Pasardhësve të LANÇ të Popullit Shqiptar “Nderi i Kombit” deklarojmë se nuk e njohim konferencën që thërret Hulusi Hako dhe Veli Myftari.
Kjo konferencë nuk është legjitime, sikurse nuk janë legjitime asnjë prej “mbledhjeve” të tyre, përfshirë edhe disa protagonistë të vetkooptuar.
Ne, si pjesë e forumeve legjitime të Organizatës, të zgjedhur në Kryesinë e Komitetit Kombëtar, ashtu si vetë Organizata jonë e nderuar, me legjitimitetin, që buron nga vetë aktet themeltare të saj dhe nga realitetet konkrete, që flasin hapur, deklarojmë se nuk njohim asnjë nga vendimet, që mund të marrë kjo Konferencë Kombëtare, nëse do të mblidhet. Thjesht sepse janë të paligjshme.
Ja disa nga argumentet pse kjo konferencë dhe vendimet, që eventualisht organizatorët ilegjitime mund të shkruajnë, nuk janë legjitime.
1. “Vendimi” është “marrë” më 6 dhjetor 2024 nga mbledhja jolegjitime e “kryesisë” (me “anëtarë” të emëruar e jo të zgjedhur) në kundërshtim me statutin (neni 17, f.19). Nuk u referua asnjë material i parashikuar në rendin e ditës dhe nuk u votua asnjë vendim në “mbledhjen” e Komitetit Kombëtar të datës 20.12.24, që, gjithashtu ishte pa kuorumin e domosdoshëm për t’u konsideruar mbledhje.
2. Thirrja e kësaj konference nuk respekton afatin statutor mes dy konferencave. Konferenca e 12 Kombëtare u mblodh më 20.11.21. Deri më 28 mars bëhen vetëm 3 vjet e 4 muaj! Sipas akteve të Organizatës duhen akoma edhe së paku 20 muaj.
3. Kjo konferencë është ilegjitime në çdo kuptim të fjalës, ashtu si te gjitha “mbledhjet e institucioneve”, çdo “vendimmarrje”, çdo “urdhër”, çdo dokument i prodhuar dhe firmosur në emër të Organizatës apo forumeve respektive nga z. Hulusi Hako dhe z. Veli Myftari.
a. Hulusi Hako është refuzuar të regjistrohet si kryetar nga gjykata me vendimin nr. 1549/4, datë 30.06.23.
b. Veli Myftari është çrregjistruar si sekretar i pergjithshëm me vendimin e gjykatēs nr. 1549/5, datë 10.10.2024. Gjithashtu është përjashtuar dhe çregjistruar si antar organizate nga Organizata 29/1 ku bën pjesë sipas kriterit të territorit të vendbanimit në Tiranë.
c. Idajet Beqiri – prezantohet si n/kryetar i Komitetit Kombëtar, ndonëse ky dhe 5 n/kryetarë të tjerë janë kooptuar (caktuar) në mënyrë të paligjshme, pra nuk janë zgjedhur sipas statutit (neni 18). Ndërkohë është kryetar i Partisë së Unitetit Kombëtar.
d. Organizata nuk ka as kryetar të komisionit të revizionit, sepse Flora Agolli ka braktisur detyrën që i besoi Konferenca 12 Kombëtare për t’u punësuar në administratën e Komitetit Kombëtar. Këta drejtues jolegjitimë, në shkelje të statutit, të procedurave statutore, rregullave organizative dhe ligjit që rregullon organizimin dhe funksionimin e shoqatave/organizatave jofitimprurëse, kanë shkrirë kryesinë legjitime.
3. Gjithashtu, delegatët e kësaj konference janë emëruar nga “drejtuesit” qendrorë. Shembull konkret është Tirana që miratoi “formalisht” në komitet listën emërore të 65 delegatëve.
Për arsyet e mësipërme deklarojmë me keqardhje dhe në kundërshtim me dëshirën tonë, se jemi të detyruar të mos e njohim dhe të mos marrim pjesë në këtë Konferencë. Ftojmë të gjithë Komitetet e Veteranëve dhe Pasardhësve në çdo bashki dhe të gjithë delegatët e caktuar, të mos e njohin dhe të mos marrin pjesë në konferencën e datës 28.03.25.
Miratuar nga mbledhja e Kryesisë legjitime të Komitetit Kombëtar
Kësaj deklarate iu bashkua shoku Naxhi Zhupa, veterani e invalidi 95 vjeçar i LANÇ, ish-partizan i brigadës së 8 S.
—-
Deklaratë e Kryesisë së Komitetit Kombëtar të Organizatës së Veteranëve dhe Pasardhësve të LANÇ të popullit shqiptar ndaj “Konferencës Kombëtare” të datës 28.03.2025
