Qeveria nuk tërhiqet nga ligji, për t’i marrë vetëm sektorit të ndërtimit 3% të sipërfaqes mbi 2000 metra katrorë për efekt të strehimit social.
Ndonëse shoqata e ndërtuesve ka kërkuar që kjo taksë të mos paguhet vetëm nga ata, qeveria pritet të ndryshojë këtë nen të ligjit, ndryshim i cili është vetëm në funksion të bashkive.
E thënë ndryshe, pas miratimit të këtij ndryshimi, sipërfaqja e banimit që duhet të vihet në dispozicion mund të konvertohet në vlerë monetare.
“Ne nuk kemi bërë ndonjë ndryshim të madh. Aty ku sipërfaqja mbi 2000 metra katrorë është e vogël dhe nuk përkthehet në njësi banimi të mund të konvertohet me vlerë tregu në vlerë monetare. Ndërkohë që do të sanksionojmë që në të gjitha bashkitë e tjera të merret në njësi banimi”, -u shpreh ministrja e Financave dhe Ekonomisë, Delina Ibrahimaj gjatë prezantimit në komisionin parlamentar të Punës, Çështjeve Sociale dhe Shëndetësisë.
Por nga 61 bashki, vetëm në 9 prej tyre është arritur që të zbatohet 3% për strehimin social. E thënë ndryshe, në 5 vite të zbatimit të këtij ligji janë rreth 43 mijë metra katrorë që shteti ka marrë për llogari të të pastrehëve, ku 88% e kësaj sipërfaqe i takon bashkisë Tiranë.
“Nga kjo sipërfaqe nëse do ta konvertonim në apartamente janë 500-540 apartamente që ka përfituar bashkia Tiranë. Në total bashkia ka mledhur 1.9 miliard lekë nga fondi I strehimit social”- tha mw tej ministrja.
“Ju po thoni që bashkia ka shkelur ligjin, pasi një vendim këshilli bashkiak nuk mund të dalë mbi ligjin. Në ligj është e shkruar qartë që vlera jepet në objekt dhe jo në para, siç e ka mbledhur Bashkia Tiranë gjithë këto vite”, tha deputeti Petrit Vasili.
Ndërtuesit e kanë konsideruar ligjin e qeverisë si antikushtetues, pasi strehimi social është një fenomen për të cilin duhet të kontribuojnë të gjithë, dhe jo vetëm kompanitë e ndërtimit.
p.k\dita