Kryeministri Edi Rama ka reaguar në lidhje me protestën që opozita pritet të mbajë në orën 17:00 përballë ambienteve të kryeministrisë.
Përmes një postimi në rrjetin “X”, Rama shprehet se protesta e thirrur nga Partia Demokratike, vjen pas deklaratave të një të arratisuri nga drejtësia, duke iu referuar ish-zv. Kryeministrit Arben Ahmetaj.
Rama thekson se “protestat mbi broçkullat e një të arratisuri” tregojnë gjendjen e opozitës, e cila sipas tij në 11 maj do të marrë humbjen më të thellë që nga 2013.
“Sot bufi stërplak i kënetës opozitare dilka bashkë me kënetën e tij në protestë dhe frymëzimi i protestës qenkan broçkullat e një të arratisuri në kërkim nga drejtësia për korrupsion e fshehje pasurie. Duhet përshëndetur kjo protestë, sepse është një pasqyrë e qartë sa s’ka e alternativës së kalbur të një kënete politike humbësish të degraduar, të cilën më 11 maj shqiptarët duhet ta çojnë drejt tharjes, duke votuar të vetmen forcë politike të denjë në Shqipëri, Partinë Socialiste të Shqipërisë Vetëm duke e braktisur kënetën e bufit stërplak, demokratët do të krijojnë hapësirë për rilindjen e një opozite politike të denjë për Shqipërinë anëtare të Bashkimit Europian, përndryshe humbjet vetëm do të thellohen edhe përtej 11 majit, kur protestuesit e sotëm do të jo vetëm të humbur për të dhjetën herë radhazi, po edhe me diferencën më të thellë me Partinë Socialiste, qysh nga viti 2013”, tha Rama.
i.b./dita
