Kryetari i Partisë Demokratike Sali Berisha hodhi poshtë propozimin e socialistëve për të ngritur një komision për ndryshimin e Kushtetutës dhe për të diskutuar ndryshimin e sistemit zgjedhor dhe uljen e numrit të deputetëve. Berisha para gazetarëve deklaroi se qëllimi real i PS është ndërhyrja në Kushtetutë për të penguar SPAK-un, duke premtuar se PD nuk bashkon votat me Edi Ramën për këtë çështje.
“Ne nuk bashkojmë votat me Edi Ramën dhe ai po përgatit, se tani problemi i tyre është lufta kundër Skapit, se këtu duan të dalin ata, po të harrojnë se do marrin kurrë një votë të PD, pasi ata e kanë betejë politike, nuk e kanë betejë në interes të qytetarëve”, tha Berisha.
Berisha përsëriti se kërkesa kryesore e opozitës është ndryshimi i sistemit zgjedhor në proporcional kombëtar me lista të hapura.
“PD ka rënë dakord me kërkesën e aleatëve të vet dhe të tjerëve në përpjekjen më serioze për të gjetur mirëkuptimin më të gjerë si opozitë, më të drejtë dhe më të ndershëm, secili pjesën e vet, kjo është ai ligj dhe ne e bëjmë. Kushte, të cilat kërkojnë të pengojnë këtë, ne nuk pranojmë. Ne nuk kemi pse pranojmë sepse ne nuk gjykojmë se pa zgjidhur problemin elektoral, nuk mund të ketë një reformë kushtetuese”, tha Berisha.
Pak ditë më parë në komisionin e reformës zgjedhore, bashkëkryetari socialist Damian Gjiknuri i bëri një ofertë PD; mazhoranca është gati të diskutojë ndryshimin e sistemit zgjedhor nëse PD pranon të diskutojë uljen e numrit të deputetëve në 101.
j.l./ dita
