Një mesazh që pretendon se vjen nga Posta Shqiptare ju flet për një pako që ju ka ardhur. Por nuk vjen nga Posta. Mos e klikoni, mos u përgjigjni. Është një mashtrim.
Mesazhi në fjalë u shfaq fillimisht dy muaj më parë. Me anë të një njoftimi, Policia e Shtetit e vuri në dukje këtë problematikë, duke theksuar se autorët që dërgojnë këto mesazhe, për të fituar besueshmëri, përdorin emërtimet e institucioneve të ndryshme shqiptare, siç është rasti i këtij mesazhi nga një adresë joreale e Postës Shqiptare.
“Nëse ju ka ardhur një mesazh i tillë dhe ju keni shpërndarë të dhënat tuaja personale apo nëse jeni mashtruar nga një aktivitet i tillë, paraqituni në polici”- bën thirrje Policia.
Ato tentojnë pikërisht tju bëjnë kurioz që t’i klikoni – për të hyrë më pas në të dhënat tuaja personale, në llogaritë tuaja bankare apo të dhënat e pronësive.
Ekspertet dhe policia u bëjnë thirrje qytetarëve, që të mos ju përgjigjen mesazheve të tilla sepse mund të bien pre e mashtrimeve online.
Nëse njerëzit nuk presin një pako nuk kanë pse klikojnë për të marrë një pako si në rastin konkret dhe kështu me radhë me rastet e ngjashme.
Raste të tjera ndodhin kur pranojmë email-e të ndryshme nga njerëz të panjohur me email të paidentifikuar, por me përmbajtje manipulative.
Ata prezantohen si zyrtarë bankash dhe pastaj bëjnë ofertë për bashkëpunim, duke ju folur për një testament, se keni fituar para nga dikush që ka vdekur në aksident, e situata të ngjashme.
Kërkesa e këtyre manipulatorëve kibernetikë është që të dërgoni të dhënat tuaja, një kartelë banke, një dokument identifikimi e gjëra të tilla që janë të nevojshme për t’i realizuar qëllimet e tyre.
Përmes, një fotoje të dokumentit të identifikimit ka raste që persona të ndryshëm kanë tërhequr edhe kredi bankare në emrin e viktimave që më pas rezultojnë debitorë pa patur aspak dijeni se “kanë marrë kredi” që nuk e kanë paguar (!)
Ose përmes blerjeve online janë marrë numrat e kartave etj.
Vihet re se gjatë vitit 2023 pati një rritje 40% krahasuar me vitin 2022 sa u përket rasteve të mashtrimeve online, sipas statistikave të bëra publike nga Policia e Shtetit.
