Kryeministri Edi Rama u ka bërë një tjetër thirrje emigrantëve në Greqi që të marrin zarfet në postë dhe të shprehin vullnetin e tyre për zgjedhjet e 11 majit.
Në një videomesazh, ai u kujton emigrantëve që jetojnë në ishujt grekë se këto janë 24 orët e fundit për të kthyer mbrapsht zarfin me fletën e votimit.
“Mbarova në Devoll, tani po shkoj në Pogradec. Ndërkohë, pashë informacionin e fundit që DHL-ja ka shpërndarë mbi 85% të zarfeve, por tani është radha juaj. Është radha juaj shqiptarë të Greqisë, të regjistruar për 11 majin që ato zarfe t’i ktheni për t’i dërguar në Shqipëri. Ju lutem, mos e lini për muajin e fundit. Ju lutem, atyre që janë në ishuj, këto janë 24 orët e fundit për ta, sepse përndryshe nuk arrihet dot transporti i zarfeve nga ishujt në afatin e caktuar.
Ju lutem, ata që janë në Athinë, Selanik dhe në gjithë Greqinë, në gadishull të bëjnë të njëjtën gjë. Ju lutem, sepse ky është një takim me historinë. Kjo votë, sidomos për ju që jeni në Greqi dhe që jeni të regjistruar është kaq konkrete, është kaq e lidhur me një gjë shumë konkrete, duke filluar nga hapja e një rruge alternative për pensionet tuaja. Ju lutem! Zarfin mbrapsht drejt Tiranës, me 5-ën për Shqipërinë me BE-në në Europë, për Shqipërinë e re europiane, për shpresën europiane dhe amanetin europian të shqiptarëve dhe kurrsesi për një politikan të lashtë, të dëshpëruar, të pashpresë dhe tanimë krejtësisht të përçartur”, tha Rama.
i.b./dita
