Ndërsa vijon numërimi i votave për zgjedhjet vendore të një dite më parë, deri tani janë 19 bashki ku ka përfunduar ky proces. Është fjala për Librazhin, Cërrikun, Peqinin, Klosin, Kolonjën, Delvinën, Selenicën, Pustecin, Pukën, Tropojën, Hasin, Dropullin, Roskovecin, Memaliajn, Këlcyrën e Libohovën, krahas Kamzës, Elbasanit e Vorës tre bashkitë ku fituesit u mësuan që mbrëmë çka u mundësua falë votimit e numërimit elektronik.
Bie në sy fakti se Sali Berisha u thye në vendlindje, pasi Tropoja u fitua nga kandidati i Partisë Socialiste. Rexh Byberi mori 5 mijë e 126 vota kundrejt 4 mijë e 876 të rivalit Besnik Dushaj i Koalicionit “Bashkë Fitojmë”.
Harta elektorale sa vjen e bëhet rozë, pasi me përjashtim të Pukës, Libohovës, Hasit e Memaliajt ku fituan kandidatët e “Bashkë Fitojmë”, në të tjerat fitues janë kandidatët e Partisë Socialiste.
Po ashtu, theksohet se janë 42 bashki ku vijon numërimi, në shumicën e tyre kryesojnë emrat e kandiduar nga PS-ja.
Në bashki të mëdha si Tirana e Durrësi kryesojnë bindshëm Erion Veliaj, i cili po shkon drejt një mandati të tretë dhe Emiriana Sako, e cila gjithashtu synon një tjetër mandat në krye të Bashkisë Durrës.
Surprizon Shkodra, Benet Beci i PS-së kryeson ndaj kryebashkiakut aktual, Bardh Spahia i “Bashkë Fitojmë”, i cili u zgjodh vitin e kaluar, në vendoret e pjesshme të 6 marsit 2022.
Socialistët fituan bindshëm në Kamëz, ku Rakip Suli u rizgjodh si kryetar bashkie me 60% të votave. Edhe Vora u kthye rozë ku u zgjodh kryetar bashkie Blerim Shera me 73% të votave. Në krye të bashkisë Elbasan u zgjodh me rezultat 56% të votave.
Bashkia e katërt që përfundoi procesin ishte Pusteci, ku u besua socialisti Pal Kolefski me 63%. Para pak çastesh u mbyll votimi edhe në Delvinë ku fituan sërish socialistët me në krye Besmir Veliu prej 62% të votave.
Numërimi i votave ka përfunduar në bashkinë Klos të Shqipërisë, dhe ka triumfuar kandidatja socialiste Valbona Kola.
Kola mori 4489, kurse Bedri Hoxha nga koalicioni “Bashkë Fitojmë” 3498 vota.
j.l./ dita
