Komisioni Qendror i Zgjedhjeve do të miratojë sot plotësimin e vendeve të mbetura bosh në Parlament si pasojë e kandidimit për kryetarë bashkie në zgjedhjet lokale të 14 majit.
Por në rendin e ditës bie në sy fakti që dy kandidatë për deputetë që ishin në krye të renditjes për të marrë mandatet nuk e kanë pranuar atë.
Kështu pas largimit të Benet Becit nga lista e PS-së në Shkodër, në radhë për ta marrë mandatin ishte Ilir Beqja, por siç mësohet edhe nga rendi i ditës i publikuar, Beqja nuk e ka pranuar mandatin.
Në renditjen e KQZ-së, pas Beqjes është Frrok Gjini, i cili pritet të marrë edhe mandatin e deputetit.
E njëjta situatë është edhe me listën e Partisë Demokratike, ku pas largimit të Zef Hilës që do të kandidojë për kreun e Bashkisë së Vaut të Dejës në radhë ishte Bardh Spahia që nga ana e tij po kandidon për Bashkinë e Shkodrës.
Pas refuzimit të mandatit nga ana e Spahisë, vendin në Parlament pritet ta marrë Lodovik Hasani.
Deputetë të tjerë kanë lënë mandatin e deputetit për të garuar si kryetar Bashkie në zgjedhjet e 14 maji. Luçiano Boçi pritet të zëvendësohet nga Qani Xhafa.
Belind Këlliçi do të zëvendësohet nga Asllan Dogjani.
Besjan Ajazi kandidon në Gramsh dhe mandati i deputetit i kalon Shkëlqim Bullarit.
Rendi i ditës në KQZ
“Për shpalljen e moszgjedhshmërisë së kandidatit të radhës në listën shumemërore të Partisë Socialiste të Shqipërisë, Qarku Shkodër, z. Ilir Hamit Beqaj, për plotësimin e vakancës së njoftuar nga Kuvendi i Shqipërisë.
“Për shpalljen e moszgjedhshmërisë së kandidatit të radhës në listën shumemërore të Koalicionit Partia Demokratike – Aleanca për Ndryshim, Qarku Shkodër, z. Bardh Ali Spahia, për plotësimin e vakancës së njoftuar nga Kuvendi i Shqipërisë.
j.l./ dita
