Biznesmeni Ardian Nikulaj ishte aktivist politik vendor i PSD-së së Tom Doshit prej disa vitesh dhe aktualisht kandidat për këshilltar bashkiak në Lezhë me këtë forcë politike.
Janë zbardhur detaje të reja nga atentati i regjistruar mesditën e sotme në Shëngjin të Lezhës, ku u ekzekutua biznesmi Ardian Nikulaj (Marku) brenda lokalit të tij.
Burime pranë grupit hetimor bëjnë me dije se dyshohet se autori ka ardhur nga Shkodra dhe pasi ka kryer vrasjen është larguar sërish drejt atij qyteti.
Autori ka vepruar i vetëm, i cili ka ardhur me një motorçikletë, me skafandër në kokë dhe jelek fosforishent. Mësohet se tre dëshmitarë okular në vendin e ngjarjes kanë dëshmuar për grupin hetimor se autori ka krijuar përshtypjen se ishte postier.
Dyshohet se autori ka qëlluar me një armë zjarri pistoletë tip TT, ku ka zbrazur 6 plumba, një prej të cilave e ka zënë viktimën në ballë dhe një tjetër në trup.
Ardian Nikulaj ishte kandidat për Këshillin Bashkiak në Lezhë me Partinë Socialdemokrate të Tom Doshit, teksa në zgjedhjet e vitit 2021 ka qenë dhe kandidat për deputet me këtë forcë politike.
Më herët ka qenë drejtor i Aluiznit në Lezhë.
