Zgjedhjet tashmë mund të quhen të përfunduara, teksa i hapet rrugë shqyrtimit të ankimimeve nga KQZ. Në përfundim të zgjedhjeve, kryekomisioneri Ilirjan Celibashi ka bërë me dije pak më parë në konferencë, se pjesëmarrja ka qenë 38.22%. E thënë ndryshe kanë votuar 1.395.360 nga 3.650.658 emrat në listë. Në lidhje me problematikën që Kryeministri Edi Rama e ka cilësuar si një dështim skandaloz të KQZ, kryekomisioneri Ilirjan Celibashi zgjodhi që të mos i përgjigjej. “Nuk kam asnjë koment për këtë deklaratë të kryeministrit”, tha ai.
Në përgjigje të kryeministrit Edi Rama, kryekomisioneri Ilirjan Celibashi theksoi se vetëm 5% e qendrave të votimit janë hapur pas orës 08:00. Kjo vonesë sipas tij nuk ka pasur një impakt të madh në proces. “90% e qendrave të votimit, është hapur mes orës 07:00 dhe 7:30, vetëm 5% pas orës 8 dhe për 5% të tjera ka filluar mes orës 08:00 dhe 09:30, pra janë vetëm 5% e qendrave ku procesi ka filluar pas orës 8, këto janë fakte dhe pastaj mbi këto fakte, mund të bëjë vlerësimin e vet, por asesi impakti i kësaj vonese ka qenë negativ mbi mbarëvajtje së procesit, e di që kanë shkuar votues dhe nuk kanë mundur të votoj, prandaj ne i japim gjithë ndjesën tonë, sepse do duhet të ishte hapur në orën 07:00”, tha Celibashi.
