Trafikimi i 13 klandestinëve me qëllime përfitimi, për t’i kaluar drejt kufirit verior të vendit dhe destinacion ato të BE-së, i ka kushtuar arrestimin të dyshuarit Agim Kasapi. Policia e Shkodrës konfirmoi finalizimin e aksionit. 66-vjeçari u kap në flagrancë duke transportuar, kundrejt pagesës, drejt kufirit me Malin e Zi, 13 të huaj që i kishte marrë në Sarandë. Gjatë operacionit, në aksin rrugor Lezhë-Shkodër, në vendin e quajtur “Beltojë”, shërbimet i kanë bërë shenjë ndalimi automjetit (furgon) me drejtues Agim Kasapi. Në këtë automjet ishin pasagjerë nga Bangladeshi dhe India, të cilët i kishte marrë në Sarandë dhe po i transportonte kundrejt pagesës. Automjeti tip “Huyndai” u sekuestrua në cilësinë e provës materiale, së bashku me 2 aparate celulare, 22000 lekë dhe 450 euro, që besohet se vijnë nga aktiviteti i paligjshëm. “Vijojnë veprimet hetimore për identifikimin dhe vënien përpara përgjegjësisë ligjore të shtetasve të tjerë të përfshirë në këtë veprimtari kriminale”, tha policia.
Po trafikonte 13 klandestinë nga Bangladeshi dhe India drejt Malit të Zi, arrestohet 66-vjeçari
