Për herë të parë në këto 30 vite, zgjedhjet e 11 majit shihen si një mundësi e artë për partitë e reja. Në këto vite demokraci, PD dhe PS kanë dominuar politikën, por në këto zgjedhje, duke qenë se për herë të parë do të jetë dhe vota e diasporës, disa parti të reja janë parë si një sinjal se ndryshimi po vjen.
Sondazhet e bëra brenda dhe jashtë vendit tregojnë se ka një pakënaqësi të madhe ndaj PD-PS dhe një rritje të ndjeshme të Lëvizjes Bashkë, Shqipëria Bëhet apo Nismës Thurje.
Por edhe pse këta të rinj shihen si e ardhmja e politikës, duket se politika e vjetër i ka infektuar dhe ata, pasi sot ka plasur sherri mes Arlind Qorit, Adriatik Lapajt dhe Endri Shabanit.
Lëvizja Bashkë kishte njoftuar një protestë para Ministrisë së Brendshme, për rastin e policit Azbi Spahiu, i cili ra në mënyrë të dyshimtë nga kati i 11 i një pallati. Por aty ka pasur një incident. Fjalën ka tentuar ta marrë Adriatik Lapaj i Shqipëria Bëhet. Mbështetësit e Arlind Qorit nuk e kanë lejuar, pasi sipas tyre e kanë organizuar ata protestën. Kjo ka sjellë akuza dhe përplasje. Lapaj u është drejtuar me thirrjet: “Komunistë”. Ndërsa ata të Lëvizjes Bashkë e kanë cilësuar si ‘të kapur’.
Lidhur me këtë sherr ka reaguar dhe vetë kreu i Lëvizjes Bashkë, Arlind Qori. “Hyn në skenë provokatori i parë, një djalë i gjatë që në fillim të protestës del përpara kamerave dhe nis të shajë Lëvizjen BASHKË se po e përdor protestën për vota. Pas kërkesave të panumërta ndaj policisë për të larguar prishësin e protestës që shtyhej e shante kë t’i dilte përpara, më në fund policët e larguan.
Pas thirrjeve të shumta kundër oligarkisë dhe qeverisë, nisën fjalimet. Unë e kam regjistruar emrin të katërtin. Pas fjalimit tim ia jap mikrofonin drejtuesit të protestës, pedagogut Redi Muçi. Kur kthej kokën shoh që në majë të podiumit të Lëvizjes BASHKË – në protestën e thirrur më parë se kushdo tjetër nga Lëvizja BASHKË dhe për të cilën Lëvizja BASHKË kishte marrë edhe lejen në polici – kishte mbirë Adriatik Lapaj dhe po kërkonte të merrte me forcë mikrofonin. Redi Muçi me qytetari po i thoshte se në protestë flitet me radhë dhe kushdo që do të flasë duhet të shënojë më parë emrin në listë dhe të presë radhën. Kështu që mjaftonte të respektonte rregullat dhe radhën dhe do t’i jepej fjala sa të donte”, tha ai.
Ndërkohë pjesë e sherrit është bërë dhe Endri Shabani i Nismës Thurje. Në një reagim në rrjetet sociale, Shabani thekson se kjo është një ngjarjen e shëmtuar dhe sjellje e politikës së vjetër.
Shabani thekson se të digjet Shqipëria për një karrige është politikë e vjetër. Sipas Shabanit, nuk duhet e nuk mund të ketë pronarë kauzash. /Pamfleti
