Krahas rritjes së pagave që do të vijojë, mbështetja për bluzat e bardha do të jetë edhe në strehim. Në hapjen e spitalit të ri të Sëmundjeve të Brendshme në Qendrën Spitalore Universitare “Nënë Tereza”, kryeministri, Edi Rama ka bërë me dije se çiftet e reja të mjekëve, do të favorizohen në lidhje me kushtet e blerjes së banesave. Për këtë kategori, blerja e një banese nuk do të jetë njësoj siç ndodh në të gjithë tregun bankar, por do të aplikohen vlera më të ulëta.
“Ne kemi vendosur të rrisim pagën për mjekët specialistë që është një fakt i kryer dhe paga e muajit prill do të jetë 5 mijë lekë të reja plus dhe do të rrisim pagën e mjekëve të përgjithshëm e do të përgatitemi për një rritje tjetër të pagës së tyre dhe kjo është e pamjaftueshme. Ndaj së shpejti do të publikojmë një tjetër program për mjekët, ushtarakët dhe punonjësit e policisë, për të garantuar strehimin e mjekëve të rinj specialistë kur të paraqiten çift jo tek. Të gjithë çiftet e reja, të freskët në martesë, do të jenë subjekte të këtij programi ku qeveria do të mbështesë kreditimin e tyre për të pasur mundësinë e marrjes së një shtëpie me kushte krejtësisht të tjera nga kushte të tregut bankar dhe në këtë mënyrë ne do i japim motivim e besojmë shumë që ky është një detyrim që shteti ta marrë përsipër në kushtet ku plotësimi i nevojave është një objektiv që do e arrijmë patjetër. Ne do të kombinojmë disa masa dhe patjetër që nuk mund të vazhdojmë para se të formësojmë një politikë të caktuar që të financojmë studimet në mjekësi me një ndarje me kushte të pranueshme kur studentët rrinë në Shqipëri”, deklaroi kryeministri Rama.
p.k\dita
