Ministria e Jashtme dhe Ambasada e Shqipërisë në Greqi kanë finalizuar me sukses projektin “Ishujt 2023”, për pajisjen me ID dhe Pasaporta për të gjithë shqiptarët që jetojnë në Kretë, Rodos dhe ishujt përreth.
Me anë të një njoftimi të bërë në rrjetin social Facebook, ministrja e Jashtme, Olta Xhaçka, bën me dije se janë 809 shqiptarë që banojnë në Greqi që kanë përfituar këtë shërbim, duke reduktuar kostot e dokumenteve të tyre biometrikë si dhe distancat e largëta.
“MEPJ dhe ambasada e Republikës së Shqipërisë në Greqi finalizuan me sukses projektin “Ishujt 2023” për ofrimin e shërbimeve për pajisje me dokumente biometrikë për të gjitha kërkesat e dërguara nga bashkatdhetarët tanë me banim në Kretë, Rodos dhe ishujt përreth.
809 shtetas shqiptarë me banim në Greqi, nga bebe të porsalindura e deri te personat në moshë të thyer, kanë përfituar shërbimin, duke reduktuar kostot e dokumenteve të tyre biometrikë si dhe distancat e largëta. Projekti zbatohet për të tretin vit radhazi në bashkëpunim me autoritetet greke”, thuhet në njoftim.
p.k\dita
