Partia Demokratike ka vendosur që më 3 mars të zhvillojë një tjetër protestë kombëtare, si ajo e të shtunës së kaluar në Bulevardin “Dëshmorët e Kombit”, para Kryeministrisë.
Protestat para Parlamentit do të vijojnë po ashtu sa herë që të ketë seancë plenare.
3 Marsi është dita kur Gjykata e Apelit në Tiranë do të shprehet per legjitimitetin e kryetarit te PD dhe do te vendos nese ai eshte Lulzim Basha apo Sali Berisha.
Vendimi ka veçanërisht rëndësi për zgjedhjet e afërta lokale.
Të dyja grupimet në PD pretendojnë se kanë të drejtën ligjore për të regjistruar komisionerë në zgjedhje, ndërkohë që ligjshmëria e statutit, logos dhe institucioneve partiake pret gjykimin në Apel.
Sipas Kodit Zgjedhor, e drejta për të propozuar komisionerë sipas Kodit Zgjedhor u takon dy partive kryesore nga mazhoranca dhe dy partive kryesore nga opozita, ndërsa kryesimi i KZAZ-ve ndahet me short mes Partisë Socialiste dhe Partisë Demokratike.
Sipas një vendimi të mëparshëm të KQZ-së “në zgjedhjet e datës 14 maj 2023 dy anëtarë në çdo KZAZ propozohen nga Partia Socialiste e Shqipërisë; një anëtar nga Partia Social Demokrate; dy anëtarë nga Partia Demokratike e Shqipërisë dhe një anëtar në çdo KZAZ do të propozohet nga Partia e Lirisë”.
