Të paktën 29 persona janë arrestuar në Minneapolis gjatë protestave për vdekjen e një gruaje e cila u qëllua nga një agjent i Shërbimit Amerikan të Imigracionit dhe Doganave (ICE).
Një oficer policie u plagos gjithashtu pasi një copë akulli u hodh mbi të, gjatë demonstratave ku morën pjesë 1,000 njerëz në rrugët e qytetit të premten në mbrëmje.
Protesta kundër zbatimit të ligjit për imigracionin janë mbajtur në të gjithë SHBA-në, pasi 37-vjeçarja Renee Nicole Good u qëllua në makinën e saj të mërkurën. Administrata Trump tha se agjenti që qëlloi me armë veproi në vetëmbrojtje. Zyrtarët vendas kanë këmbëngulur se gruaja nuk paraqiste rrezik.
Policia e Minneapolis shpalli një tubim të paligjshëm të premten në mbrëmje, ndërsa protestuesit u mblodhën jashtë Hotel Canopy në qytet, ku besohet se po qëndronin disa agjentë të ICE-së.
ICE (Immigration and Customs Enforcement) u krijua si përgjigje ndaj terrorizmit pas sulmeve të 11 shtatorit 2001, por me rikthimin e Donald Trump në Shtëpinë e Bardhë, agjentët federalë të imigracionit janë kthyer në mbrojtësit e tij personalë, të armatosur deri në dhëmbë dhe mirë të paguar, të gatshëm të bëjnë gjithçka për ta ndjekur.
ICE konsiderohet tani si një “milici trumpiane”, e përbërë edhe nga individë me të kaluar të dyshimtë, shpesh me arsim të pamjaftueshëm dhe trajnim të përshpejtuar, por me paga më të larta se ato të mësuesve, dhe me kompetenca të plota.
Edhe pse pamjet video të vrasjes së një gruaje në Minneapolis tregonin një realitet tjetër, Trump mbrojti agjentin, duke thënë se viktima kishte “sulmuar me dhunë dhe brutalitet” dhe se agjenti ishte detyruar të mbrohej. “Duket një mrekulli që ai është ende gjallë, por po rikuperohet në spital”, shtoi presidenti.
Në të vërtetë, një video e xhiruar menjëherë pas ngjarjes tregon agjentin duke kaluar rrugën dhe duke udhëzuar kolegët të largojnë njerëzit nga zona. Sipas kritikëve, shtrimi në spital shpesh përdoret nga forcat e rendit për të lehtësuar përgjegjësinë e atyre që janë të përfshirë në abuzime. Mbrojtja e Trump ndaj agjentit duket të ketë motiv politik: të tregojë publikisht se agjentët e ICE do të mbrohen gjithmonë për çdo veprim në emër të tij.
Për shkak të nivelit të lartë të pandëshkueshmërisë që i është garantuar nga qeveria, ICE në muajt e fundit është shndërruar në një “ushtri” pa kufij: stafi ka kaluar 22 mijë persona dhe nuk merret më me hetime penale, por me arrestimin dhe dëbimin e personave që konsiderohen emigrantë të paligjshëm.
Edhe protestuesit, përfshirë qytetarë amerikanë, sulmohen me dhunë, dhe askush nuk përballet me pasoja. Kjo ka bërë që agjentët e ICE të krahasohen shpesh në rrjetet sociale me “këmishat e kaltër naziste”.
Ndërkohë, agjencia ka arritur të bëhet forca federale me financimet më të larta: buxheti vjetor është trefishuar, duke arritur 30 miliardë dollarë. Pak muaj më parë, faqja qeveritare për punësime, USA Jobs, ofroi vende pune të mirëpaguar për agjentë në Phoenix, Los Angeles, San Diego dhe San Francisco. Pagat fillestare variojnë nga 50 mijë deri në 89 mijë dollarë në vit (42–76 mijë euro), plus kompensime shërbimi dhe orë shtesë.
Agjentët do të marrin gjithashtu një bonus vjetor prej 10 mijë dollarësh për katër vitet e ardhshme, si dhe sigurim shëndetësor, plane pensioni dhe 26 ditë pushime të paguara. Në vitin 2025, shpenzimet federale për armatimin e agjentëve u rritën me 600%, duke kaluar 70 milionë dollarë.
Megjithatë, nuk është e qartë sa po tërheqin këto kushte kandidatë për t’iu bashkuar një strukture gjithnjë e më të pakënaqur publikisht. Identiteti dhe historitë e agjentëve mbeten të fshehta: ata lëvizin me fytyra të mbuluara dhe nuk deklarojnë emrin, për arsye sigurie sipas departamentit. Kritikat thonë se disa prej tyre mund të kenë të kaluar kriminale ose të jenë pjesëmarrës të rebelimit të 6 janarit, të falur nga Donald Trump.
j.l./ dita
