Kreu i Policisë së Shtetit, Skënder Hita, u është drejtuar me një letër të hapur punonjësve të Policisë së Shtetit, pas shtatë ditësh përballjeje me tensione dhe akte dhune gjatë protestave.
Në mesazhin e tij, Hita shpreh mirënjohjen, respektin dhe mbështetjen për efektivët, duke theksuar se shumë prej tyre janë lënduar gjatë ushtrimit të detyrës.
Ai vë në dukje edhe dimensionin njerëzor të punonjësve të policisë, duke kujtuar se pas çdo uniforme qëndron një njeri, një prind, një bashkëshort, një bir apo një bijë, që familjarët e presin me shqetësim në shtëpi.
Kreu i Policisë së Shtetit u kërkon efektivëve të vijojnë detyrën me profesionalizëm, qetësi dhe vendosmëri, duke respektuar në çdo moment ligjin dhe dinjitetin e çdo qytetari.
Në fund ai u uron shërim të shpejtë kolegëve të plagosur dhe teksa thekson se punonjësit e policisë se nuk do të jenë vetëm në përballimin e sfidave me të cilat po përballen.
Letra e plotë:
Letër e hapur për punonjësit e Policisë së Shtetit
Të dashur kolegë,
Prej shtatë ditësh po përballeni me situata të vështira, me orë të gjata shërbimi, tension dhe akte të rënda dhune. Shumë prej jush janë lënduar në krye të detyrës.
Sot dua t’ju shpreh personalisht mirënjohjen, respektin dhe mbështetjen time të plotë.
E di se pas çdo uniforme është një njeri, një prind, një bashkëshort, një bir apo një bijë, që dikush e pret me shqetësim në shtëpi.
Asnjë sulm ndaj jush nuk është i pranueshëm. Asnjë akt dhune nuk mund të justifikohet.
Ju kërkoj të vijoni detyrën me profesionalizëm, qetësi dhe vendosmëri, duke respektuar në çdo moment ligjin dhe dinjitetin e çdo qytetari.
U uroj shërim të shpejtë kolegëve të plagosur dhe ju siguroj se nuk do të jeni vetëm në përballimin e këtyre sfidave.
Jam krenar për çdo punonjës policie që i shërben vendit me ndershmëri dhe përkushtim.
Qëndroni të fortë, të bashkuar dhe besnikë ndaj misionit tuaj.
j.l./ dita
