Drejtuesi politik i PS në qarkun Fier, Taulant Balla ka shprehur pakënaqësi nga raporti paraprak i OSBE/ODIHR-it lidhur me deklarata e tyre se gjatë fushatës elektoralë nuk pati një diskutim të gjerë lidhur me problematikat e komuniteteve dhe fshatrave.
Balla tha se kjo nuk është e vërtetë, pasi PS ka qenë në terren në çdo fshat në Fier për të dëgjuar problematikat dhe sipas tij kjo është edhe arsyeja e fitores së thellë të PS.
Për Ballën ky raport nuk duhet të bazohet nga monitorimi i mediave që pastrojnë fushatën, por në terren ku bëhet puna.
“Raporti i OSBE/ODIHR, ku zonja Glover që thotë se në këtë fushatë nuk u pa të flitej për çështje te komuniteteve. Nuk e di në cilat takime e ka parë këtë gjë, por nëse i referohen mediave dhe monitorojnë se çfarë pasqyrimi i kanë bërë mediave fushatës kjo është çështje tjetër.
Asgjë që ka ndodhur në fushatë nuk ka lidhje me atë që është pasqyruar në media. Unë i ftoj të shkojnë në një fshat të vetëm të qarkut Fier dhe të pyesin, pasi ne kemi komunikuar me njerëzit dhe pjesa kryesore e fushatës është diskutimi dhe punët që janë kryer dhe do bëhen për komunitetet.
Kjo është edhe arsyeja e madhe e një fitore kaq të thellë të PS në Fier, prandaj të monitorosh media dhe të thuash që nuk pati një diskutim mbi problematikat e komunitetit nuk është korrekte dhe kjo do shikohet deri ne fund të këtij raporti”, tha Balla.
Një ditë më parë u prezantuan konkluzionet e raportit paraprak të OSBE/ODIHR-it, ku u tha se “fushata u dominua nga liderët e Partive duke marrë pak në konsideratë interesin e zgjedhësve ku fatkeqësisht fushata dhe pasqyrimi i këtyre zgjedhjeve vendore u përqendrua më së shumti në politikën dhe partitë, veçanërisht jashtë Tiranës. Ky fokus reduktoi aftësinë reale për të bërë zgjedhjen e tyre në nivel vendor”.
p.k\dita
