Nuk tregoi plagosjen me armë mbrëmjen e së shtunës në Elbasan, arrestohet në spital 26-vjeçari. Kei Piu është vënë në prangat e policisë vendore, pasi mbeti i plagosur pas një sherri me një grup rival, në rrethana dhe motive ende të panjohura. Burime jozyrtare bënë me dije se Piu nuk ka bashkëpunuar me oficerët e policisë, për të dhënë dëshminë në lidhje me ngjarjen, duke e mbajtur të fshehtë gjithçka. Ndaj tij është ngritur akuza për pengim të zbulimit të së vërtetës. Piu rezulton gjithashtu se ka kryer kontrollet në qendrën spitalore “Xhaferr Kongoli” në Elbasan dhe është shoqëruar në ambientet e drejtorisë së policisë, ku i është komunikuar edhe masa e arrestit.
Gjatë dëshmisë është shprehur se është dëmtuar aksidentalisht në ambientet e palestrës që ka në pronësi. Nga ana tjetër, nga verifikimet e saj policia ka zbuluar lokalin ku ka ndodhur ngjarja, duke sekuestruar pamjet filmike, për të zbardhur të gjithë ngjarjen. Në pamje dallohet sulmi agresiv i grupit tjetër ndaj Piut, që duket se nuk i rrëfen autorët për shkaqe të fshehta. 26-vjeçari nuk është një personazh i panjohur në Elbasan, pasi disa vite më parë i ka shpëtuar një atentati me armë zjarri në qendër të qytetit, ndaj të cilit u qëllua mbi tre herë. Ai u plagos në vitin 2020 dhe mori 3 plumba në bark. Më pas u gjet nga policia i plagosur dhe iu nënshtrua një ndërhyrjeje kirurgjikale. Besohet se edhe ngjarja e dy ditëve më parë ka lidhje me këtë konflikt të vjetër apo zgjatimet e tij. Prokuroria po heton për ta zbardhur plotësisht këtë ngjarje.
