Skuadra e Paris Saint-Germain mori një tjetër humbje radhe, e pas traumës së eliminimit në Champions nga gjermanët e Bayern Mynih, ende nuk e ka marrë veten, duke e pësuar edhe nga modestët e Rennes, të cilët edhe në fazën e parë i kishin turpëruar kryeqytetasit. Gjigantët francezë pësuan humbjen e katërt në kampionat, që gjithsesi nuk është se ia rrezikon titullin kampion, pasi mbetet ndjeshëm i shkëputur nga ndjekësi më i afërt, Lens (+9) dhe Marsejë me një ndeshje më pak dhe 56 pikë. Parizienët u mposhtën 0-2 brenda në “Parc des Princes” nga Rennes, edhe pse kishin në fushë dyshen Messi-Mbappe. Edhe pse nuk i munguan rastet për shënim, kryesisht me Mbappenë, në fundin e pjesës së parë skuadra e Galtier u ndëshkua nga Toko Ekambi.
Sapo nisi pjesa e dytë, Kalimuendo befasoi të pranishmit, duke i dhënë epërsinë e dyfishtë Rennes.
PSG kishte thuajse gjithë pjesën e dytë për të ndryshuar rrjedhën e lojës, por nuk mundi të shënonte qoftë një gol, duke lënë shumë pikëpyetje me këtë rezultat.
