Nga Dorin Xhima
Në internet qarkullojnë shpesh materiale që i atribuohen Makiavelit. Sidomos njëra prej tyre pretendon se ekziston një “sekret”, një mënyrë psikologjike për ta bërë dikë të fiksohet, të krijojë obsesion emocional, të “të ndjekë” emocionalisht.
Përdoren terma si “kontroll total” apo “metoda e ndaluar e Makiavelit” ose “psikologjia e errësirës” etj për të tërhequr vëmendje.
Ky lloj materiali nuk jep kurrë një sekret real, por rrotullohet zakonisht rreth 3 ideve bazë, të riemërtuara si “të ndaluara”:
a) Mungesa e kontrolluar (withdrawal)
Pretendohet se nëse heq dorë papritur,
nuk je gjithmonë i disponueshëm, krijon boshllëk emocional, atëherë tjetri fillon të mendojë më shumë për ty.
Por kjo nuk është sekret. Është një reaksion normal njerëzor ndaj pasigurisë.
b) Bëhesh pasqyrë emocionale
Sugjerohet që të “bëhesh pasqyrë” për emocionet, fjalët, ritmin e tjetrit. Dmth të dukesh “si ai/ajo”, por pak më i/e ftohtë
Kjo është teknikë e njohur komunikimi, përdoret sidomos në sektorin e shitjeve, ose në diplomaci.
c) Konfuzion + shpërblim i rrallë
Ideja është që sillesh herë ngrohtë, herë indiferent, krijon paqartësi. Shpërblimi emocional bëhet i rrallë, kështu që rritet vlera e tij
Prapë nuk kemi “sekrete”. Përkundrazi, kjo është dinamikë e marrëdhënieve toksike.
Pra “sekreti” që pretendojnë këto video, përkthehet kështu:
“Mos ji i qëndrueshëm emocionalisht, krijo mungesë dhe paqartësi, që tjetri të fiksohet”
KUJDES! Këtu nuk ka asgjë mistike. Asgjë makiavelliane. Është vetëm një riemërtim i sjelljeve të vjetra manipuluese.
PSE DISA NJERËZ E BESOJNË KËTË? Këtu është pjesa interesante.
a) Truri i njeriut kërkon kontroll
Njerëzit duan formula të shkurtra, “butona sekretë”. Ideja që “mund ta bësh dikë të fiksohet” është jashtëzakonisht joshëse.
b) Autoritet i rremë
Përdoren emra si Makiavelli fjalë si dark, forbidden, secret, imazhe të forta, primitive si një gorillë që posedon një humane femër etj etj. Pse? Sepse truri e lexon si: “Dikush di diçka që unë nuk e di.”
c) Konfirmim i plagëve personale
Këto video i besojnë më shumë njerëz të refuzuar, njerëz me frikë humbjeje ose njerëz që e kanë përjetuar dashurinë si luftë.
Por video të tilla u japin justifikim, jo zgjidhje.
d) Iluzioni i fuqisë
Në vend që të punojnë me vetë vlerësimin, komunikimin real, kufijtë emocionalë, këta njerëz preferojnë:
“truke për të kontrolluar tjetrin”. Sepse fuqia e rreme është më e lehtë se pjekuria emocionale.
PASOJA REALISTE (që videoja nuk i thotë):
Funksionon vetëm për njerëz emocionalisht të pasigurt, krijon marrëdhënie toksike, të paqëndrueshme
me cikël varësie–refuzimi.
Shkurt, këto “sekrete” nuk krijojnë dashuri, por ankth lidhjeve, varësi. Dhe varësia gjithmonë përfundon keq.
—
©️Copyright Gazeta DITA
Ky artikull është ekskluziv i Gazetës DITA, gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”. Shkrimi mund të ripublikohet nga mediat e tjera vetëm duke cituar DITA dhe në fund të vendoset linku i burimit, sipas Nenit 178 të Ligjit Nr/ 35/2016
