Lista e rimbursimit të barnave dhe terapive të trajtimit për sëmundjet kronike do të zgjerohet. Po ashtu edhe numri i përfituesve që do të jenë pjesë e kësaj skeme.
Qeveria ka miratuar në mbledhjen e ditës së sotme vendimin për indeksimin e çmimeve të listës së barnave të rimbursueshme.
Pas mbledhjes së qeverisë, ministrja e Shëndetësisë dhe Mbrojtjes Sociale, Ogerta Manastirli ka theksuar se ky vendim, krijon mundësinë për të zgjeruar më shumë mbulimin me barna nëpërmjet skemës së rimbursimit për qytetarët që vuajnë nga sëmundjet kronike dhe që trajtohen nga kjo skemë, çka do të sjellë edhe zgjerimin e diagnozave të mjekimit dhe rritjen e numrit të qytetarëve që do të përfitojnë nga skema e rimbursimit të barnave.
“Lista e rimbursimit të barnave mbështet më shumë se 410 mijë përfitues, ku më shumë se 60 për qind e përfituesve janë pensionistë, persona me aftësi të kufizuar, duke i mbështetur me trajtimin medikamentoz sipas diagnozave të mjekimit që ata marrin nga mjekët e familjes. Këto kategori mbështeten nëpërmjet një liste, që ka një larmishmëri prej 1191 alternativash barnash që jepen nga mjeku i familjes, por edhe nga strukturat spitalore, për ata pacientë që trajtohen në sistemin ambulator”, tha ministrja Manastirliu.
Sipas saj, indeksimi i çmimit të barnave që bëhet nëpërmjet këtij vendimi, është tashmë një praktikë e përvitshme që siguron një benfit, një kursim të buxhetit të alokuar për barnat e listës së rimbursimit në vlerën rreth 3.6 milionë dollarë. Kursim ky që do të shfrytëzohen sërish për të mbështetur më shumë persona që janë të diagnostikuar me sëmundje kronike, për të zgjeruar alternativat e mjekimit për to, por edhe për të mundësuar që barra e rritur e sëmundshmërisë e ardhur edhe nga pandemia e covid-19 të mundet të plotësohet tërësisht.
“Për vitin 2023 ne kemi rritur buxhetin për listën së rimbursimit të barnave duke e çuar në 11,4 miliard lekë. I gjithë ky buxhet i vënë në dispozicion, si dhe përfitimi i ardhur nga indeksimi i çmimit të barnave që vjen si përfitim në buxhetin e shtetit, do të ndikojnë në përmirësimin dhe zgjerimin e terapive të mjekimit për pacientët që vuajnë nga sëmundjet kronike, po ashtu edhe zgjerimin e alternativave të mjekimit”, tha ministrja Manastirliu.
p.k\dita
