Në mbledhjen e zhvilluar gjatë ditë së sotme, Këshilli i Ministrave i ka hapur rrugë implementimit të strukturës së re të Policisë së Shtetit, në zbatim të të cilës është miratuar struktura e gradave. Konfirmimin për miratimin e strukturës së gradave e ka bërë vetë ministri i Brendshëm, Bledi Çuçi, i cili e konsideron këtë si një nga reformat më të mëdha strukturore që ka bërë Policia e Shtetit.
“Gjithashtu i hapëm rrugë zbatimit dhe implementimit të strukturës së re të policisë së shtetit duke miratuar të gjithë strukturën e gradave. Struktura e miratuar fillon zbatimin dhe është një nga reformat më të mëdha strukturore që ka bërë Policia e Shtetit, sidomos për të adresuar pjesën e riorganizimit dhe ristrukturimit tërësor të Policisë kriminale. Besoj se është një nga vendimet më të rëndësishme në zbatim të objektivave të 2023 në lidhje me rendin dhe sigurinë”, tha ministri Çuçi pas mbledhjes së qeverisë.
Pyetur me arsyen e vettingut në polici në një periudhë parazgjedhore, ministri u shpreh se ky është një proces që është në zbatim të ligjit dhe nuk lidhet me Vendoret e 14 Majit.
Çuçi u shpreh se janë 300 funksione të kupolës së Policisë së Shtetit që do të vetohen.
“Vettingu në polici është pezulluar kohë më parë me ligj, morëm kohën e duhur për të ndryshuar ligjin e vettingut në polici. Miratuam ndryshimet e reja, ku parashikuam dhe ka filluar sot që flasim vettingu për pjesën drejtuese të policisë dhe duke hequr nga vetimi trupën e madhe të policisë së shtetit. Janë 300 funksione të kupolës së policisë së shtetit që do vetohen. Nuk ka lidhje me zgjedhjet se është proces që vazhdon në zbatim të ligjit. Është miratuar ligji, dolën vendimet përkatëse të qeverisë, udhëzimet e ministrit të brendshëm janë ngritur strukturat”, deklaroi ministri Çuçi.
p.k\dita
