Urgjenca Polivalente e Spitalit Qendror në QSUT do të riorganizohet. Në një takim të zhvilluar me drejtuesit e shërbimeve mjekësore, ministrja e Shëndetësisë dhe Mbrojtjes Sociale, Ogerta Manastirli ka bërë me dije se së shpejti do të nisë transferimi i shërbimeve në spitalin e ri. Ndërkohë që pas fillimit të funksionimit të spitalit të ri, nis puna për fazën tjetër, që ka të bëjë me ndërtimin e një spitali ditor, me një kapacitet prej 60 shtretërish.
“Do të kemi një riorganizim të Urgjencës Polivalente dhe me transferimin e shërbimeve në spitalin e ri. Ne jemi gati në të gjithë ato parametrat të cilat janë kërkuar deri më sot, për të filluar tashmë transferimin dhe funksionimin e këtij spitali. Bërja funksional i këtij spitali na hap rrugën edhe drejt një investimi të ri. Aty ku sot është urgjenca aktuale, pra në godinën A1 siç e quajmë ne, apo në Spitalin e Kirurgjisë sot, do të kemi mundësinë që aty të kemi një spital ditor me 60 shtretër. Do të kemi aty edhe qendrën e dializës si dhe një strukturë të toksikologjisë brenda këtij spitali”, bwri me dije ministrja Manastirliu.
Ministrja tha se në spitalin qendror është shtuar numri i stafit me 47 punonjës të rinj, duke mundësuar që të ketë më shumë mjekë, infermierë dhe koordinatorë.
Spitali qendror në QSUT, është një spital krejtësisht i ri i ndërtuar nga themelet për sëmundjet e brendshme, vepra më e madhe infrastrukturore në shëndetësi në tre dekadat e fundit. Spitali Qendror ka një sipërfaqe ndërtimi 26 mijë m2, me kapacitet 345 shtretër ku akomodohen 14 shërbime mjekësore spitalore të specializuara nga kardiologjia, nefrologjia, hematologjia, gastrohepatologjia, mjekësia interne, endokrinologjia, dermatologjia, reumatologjia, alergologjia, urgjenca, imazheria, etj.
p.k\dita
