Kryeministri Edi Rama ka deklaruar se Korridori Jugor i Gazit e ka bërë Europën më të sigurt. Në fjalën e tij në Samitin e 10-të të Korridorit Jugor të Gazit që po mbahet në Baku të Azerbajxhanit, kreu i qeverisë u shpreh se do ndërtohet qendër gazi natyror në Vlorë.
“Aktualisht në Shqipëri po kërkojmë të ecim përpara përsa i përket gazifikimit. Duke u mbështetur në përvojën e suksesshme të bashkëpunimit me TAP, në bashkëveprim me partnerët tanë, synojmë të ndërtojmë një qendër të gazit natyror të lëngshëm në Vlorë“, tha ai.
Kryeministri theksoi më tej se së shpejti furnizimi i BE-së nga gazi rus do të shkojë në 0%.
“E vërtetë, kjo rrugë e re e mëndafshtë e energjisë e korridori jugor, është shndërruar në një urë bashkëpunimi intensiv, duke sjellë më pranë vendet, kompanitë në një format që vetëm sa shton dëshirën e mundësitë që ofron.
Sot ky format është shndërruar në një urë ku pjesë e re përbërëse është bërë dhe dimensioni i energjisë së gjelbër. Pra sot jemi dëshmitarë se Korridori jugor i gazit ka ndryshuar shumë jetë dhe ka bërë Evropën më të sigurt. Korridori jugor i gazit do mbetet një prej burimeve të pakta të qëndrueshme konkurruese të transportimit të gazit që vjen për në BE.
Me % e gazit rus në BE që po bie nga 40% në aktualisht në 8 % dhe së shpejti në 0% dhe në agjendën e gjelbër dhe përpjekjet për shkarbonizim në pikën më të lartë, gazi i Azerbajxhanit dhe rajoni kaspik janë thelbësor për të ardhmen e përbashkët”, u shpreh kryeministri.
Ky i fundit theksoi se Shqipëria është e pozicionuar strategjikisht në rrugën e gazsjellësit TransAdriatik që është një lidhje jetike në Korridorin Jugor të gazit.
“Ne synojmë të kapitalizojmë mbi këtë korridor transformues duke orientuar investimet drejt projekteve të energjisë së ripërtëristhshme dhe zhvillimit të infrastrukturës së qëndrueshme.
Shqipëria është e mbështetur 100% në energjinë e ripërtërishtme. Duam të diversifikojmë burimet tona të energjisë që mbështetet kryesisht në burimet hidrike”, tha Rama.
Ndërsa presidenti Ilham Alijev u shpreh se Shqipëria dhe Azerbajxhani kanë bashkëpunime në fusha të ndryshme. Ai u shpreh se Shqipëria ka luajtur rol të rëndësishëm në zbatimin e projektit të korridorit jugor të gazit dhe vazhdojnë të luajë rol të rëndësishëm ai anëtar i ekipit të TAP.
“Ne bashkëpunojmë në fusha të ndryshme. Kemi një dialog aktiv politik dhe takimet e mia me kryeministrin kanë një agjendë të rregullt në të dyja vendet. Mbështesim njëri-tjetrin në institucionet ndërkombëtare dhe punojmë për çështjet e sigurisë energjetike.
Shqipëria ka luajtur rol të rëndësishëm në zbatimin e projektit të korridorit jugor të gazit dhe vazhdojnë të luajë rol të rëndësishëm ai anëtar i ekipit të TAP. Po diskutojmë aspekte të ndryshme të bashkëpunimit tonë energjetik dhe jam i sigurt se gjatë diskutimeve të sotme do trajtojmë të gjitha çështjet që ekzistojnë”, tha Alijev.
b.m/dita
