Shkodra, e konsideruar një bastion i djathtë e ku socialistët kërkojnë të bëjnë historinë, është ndalesa e fundit e kryeministrit Edi Rama në turin e takimeve elektorale për 14 majin.
Krah Benet Becit, Rama iu përgjigj akuzave të Bardh Spahisë, se kjo qeveri nuk i ka financuar shumicën e projekteve vetëm pse kjo bashki është e djathtë.
Rama tha se një gjë e tillë nuk është aspak e vërtetë, duke renditur disa nga punët e bëra për këtë qytet.
“Ne Shkodrës nuk ia kemi kursyer fondet asnjëherë, se rrugën Shkodër-Velipojë, nuk e bëri Beneti me Zotin Berisha siç i thotë, por e bëmë ne, është një investim strategjik. Ai kanë marrë lekët e shpronësimit njerëzit? Se dhe këto lekë ia dha qeveria Bashkisë Shkodër. Ai e ka pasur shumë të thjeshtë detyrën se ka pasur njerëz plot që ia kanë marrë sapunin që e kanë ngrënë për djath parmixhan. Shkodra i ka dhënë mbështetje të verbër atij që Beneti i thotë Zoti Berisha. Shkodra dhe pse ka nga Zoti apo nga natyra më shumë se të tjerët, ka sot më pak se gjithë të tjerët. Askujt tjetër Zoti nuk i ka dhënë atë që i ka dhënë Shkodrës. Këtu nuk ka funksionuar vota”, tha Rama.
