Teksa ishte në Durrës, kreu i qeverisë Edi Rama, ka bërë me dije se qeveria po negocion për të sjellë në Durrës një prej akademive më elitare të futbollit. Sipas Ramës, kjo akademi rajonale e futbollit do të jetë një derë e hapur për të gjitha talentet shqiptare.
“Jemi duke u negociuar dhe kemi shumë afër një marrëveshje të re, për të sjellë në Durrës një nga akademitë më elitare të futbollit, një prej skuadrave më të fuqishme të botës. Duam ta sjellim në Durrës si një pol të ri sportiv, një akademi rajonale të futbollit që do jetë derë e hapur për talentet që do duan të provojnë veten dhe do zgjidhen për t’u përgatitur për arenën e madhe europiane kur talenti, puna dhe vlerësimi do përputhen”, tha Rama.
Më tej, kryeministri Rama bëri me dije se paralelisht me Akademinë e Futbollit, po punohet për një shkollë futbolli për fëmijët, e cila do të jetë shumë më e gjerë se akademia.
“Paralelisht me akademinë e futbollit do jetë dhe një shkollë e futbollit për fëmijët e cila do jetë shumë më e gjerë, se akademia do jetë e mbështetur te garancia e talenteve, ndërsa shkolla do jetë për shumë më tepër fëmijë dhe për të parë si ata zhvillohen në proces. Ky projekt po negociohet aktualisht, por s’mund të them emrin e skuadrës por kur ta dëgjoni do thoni: a është e vërtetë kjo? Do ta mbajmë veten deri kur ta publikojmë”, vuri në dukje Rama.
p.k\dita
