Kryeministri Edi Rama në lidhjen e tij live në “Facebook” në rubrikën “Sy m’sy” foli në lidhje me pensionet pasi u pyet nga një zonjë. Rama u shpreh se ata nuk kanë ndenjur duar kryq ndërsa theksoi se kanë bërë 15 marrëveshje për pensionet me vendet ku janë shqiptarë.
Ai gjithashtu theksoi se janë duke negociuar me qeverinë greke që sipas tij është marrëveshja më e vështirë. Sipas tij e vështirë ishte edhe marrëveshja me Italinë. Rama theksoi se duke bërë marrëveshjet me Italinë kanë garantuar se vitet e punës së pensionistëve shqiptarë në Itali të njihen.
“Mesa kuptoj unë zonjë ju shkruani nga Greqia, keni shkuar atje mbase në vitet ‘90 ose më vonë por jeni atje, keni punuar atje me siguri dhe nuk keni paguar asgjë në sistemin e sigurimeve shoqërore të Shqipërisë. Si ju janë qindra mijëra të tjerë. Si gjenden këto para që t’ju jepet të gjithëve pensioni që do të dëshironin? Ama nga ana tjetër nuk kemi ndenjur duarkryq por kemi bërë 15 marrëveshje për pensionet me vendet ku janë shqiptarë, dhe jemi duke negociuar me qeverinë greke, që është marrëveshja më e vështirë.
Dy ishin të vështira, Italia. Bëhen shumë më shpejt gjërat këtu se në vendet e BE se sa kohë u bë që është firmosur marrëveshja me Italinë, ka shkuar në parlament, është një histori burokracie dhe procedurash, vendet më të zhvilluar kanë më shumë burokraci, kështu që duke bërë marrëveshjet me Italinë kemi garantuar se vitet e punës së pensionistëve shqiptarë në Itali njihen. Shumë herë mirë dhe nganjëherë keq, kjo qeveri dhe unë në krye të saj jemi këtu për të bërë një detyrë. Nuk jam këtu për të dëgjuar gjithë farë lloj llafesh dhe për të gëlltitur poshtërsitë dhe sulmet ndaj meje, familjes, njerëzve me të cilët punoj sepse kam një axhendë tjetër por sepse jam në një mision”, tha Rama.
j.l./ dita
