Tirana do të jetë organizatorja e Forumit Ndërkombëtar të Turizmit. Kryeministri Edi Rama ka konfirmuar lajmin, teksa po zhvillon një vizitë në Berlin.
Kreu i qeverisë tha se kjo vjen si një bashkëpunim i ministrisë sonë të Turizmit e Mjedisit me Organizatën Botërore të Turizmit, bisedë që është zhvilluar gjatë vizitës së kreut të qeverisë shqiptare në Berlin.
“Shqipëria në ITB Berlin, Panairi më i madh i Turizmit në botë, ku më në fund përfaqësohemi denjësisht jo thjesht me natyrën e bukur po me një ofertë serioze turistike, falë punës këmbëngulëse vit pas viti, ndryshimit të imazhit të zymtë të Shqipërisë së deri disa viteve më parë, investimeve publike e private, si edhe një armate të dinamike operatorësh turistikë.
Pason në prill Forumi Ndërkombëtar i Turizmit në Tiranë, një bashkëpunim i ministrisë sonë të Turizmit e Mjedisit me Organizatën Botërore të Turizmit, për të cilin biseduam në Berlin edhe me Sekretarin e Përgjithshëm”, shkruan Rama.
Nga ana tjetër, një prej përfaqësuesve në stendën shqiptare në Berlin, tregon se ka pasur shumë kërshëri për Shqipërinë, teksa Rama nuk kurseu batutat.
Përfaqësuesja e Shqipërisë: Është uri e frikshme, unë e kam frikë gjithë këtë dallgë. Ishalla ia dalim mbanë
Kryeministri Edi Rama: Për ça e ke frikë? Ne për këtë ditë kemi punuar, ti ke frikë.
m.b./dita
