Partia Socialiste do të zhvillojë më 4 nëntor Kongresin e Jashtëzakonshëm. Sipas udhëzimeve të selisë rozë, delegatët në orën 11:00 do të duhet të jenë tek Pallati i Kongreseve për të zyrtarizuar vendimet e Asamblesë në fillim të sezonit të ri politik. Më 4 shtator kryesocialisti Edi Rama bëri ndryshime në sekretariatin ekzekutiv të partisë që drejton duke hequr Damian Gjiknurin si Sekretar të Përgjithshëm.
Emrat e rinj me në krye zëvendësuesin e Gjiknurit, Blendi Klosi, që më herët mbante detyrën e sekretarit organizativ do të votëbesohen për të nisur punën në postet drejtuese në parti. Gjithashtu numri dy i partisë, Blendi Klosi do të prezantojë para delegatëve platformën për forcimin dhe organizimin e mazhorancës socialiste, si një parapërgatitje për vitin zgjedhor.
Organi më i lartë vendimmarrës i PS do të mblidhet sërish në fillim të verës së vitit të ardhshëm, i cili përpos piketave për zgjedhjet parlamentare të 2025 do të jetë një Kongres Zgjedhor, ku në mes të socialistëve do të ketë sërish ndryshime, pasi forumet e kësaj force politike do t’i nënshtrohen votës së delegatëve.
p.c. / dita
