Duke vlerësuar nismën e qeverisë së tij për rritjen e premtuar të pagave, kryeministri Edi Rama është ndalur sot tek ndryshimet që do të pësojnë pagat e Ushtrisë Shqiptare, për të cilat tha se ishin një arsye për t’u ndjerë keq.
Në një postim të bërë në rrjetin social facebook, kryeministri Rama thekson se ky realitet do të ndryshojë, duke u zotuar se pagat e Forcave të Armatosura do të arrijnë në nivelin e NATO-s.
“Pagat e Ushtrisë Shqiptare ishin për një kohë të gjatë një arsye për t’u ndjerë keq për trupat e Forcave të Armatosura, por s’kishim asnjë rrugë tjetër përveçse të çonim përpara me këmbëngulje e durim ndryshimet e domosdoshme, pa të cilat pagat nuk mund të rriteshin siç duhej dhe siç e dëshironim të gjithë. Tanimë kushtet kanë ndryshuar shumë dhe ushtarakët tanë nuk janë më të fundit e rajonit për nivelin e pagave të tyre, përkundrazi, ata kanë paga ndër më të lartat të cilat do të vazhdojmë t’i rrisim drejt mesatares së NATO-s”, shkruan Rama.
Në të njëjtën kohë, ai thekson se reforma në pagë është fryt i një punë të gjatë të qeverisë. Ai thekson se kontribues i kësaj reforme është ulja e korrupsionit dhe rritja e prodhimit të brendshëm.
“Pagat e reja , falë të cilave paga mesatare në Shqipëri thuajse dyfishohet duke arritur majën historike të 900 eurove në 2024, janë frut i një përpjekjeje të gjatë, këmbënguljeje e durimi të madh për reforma të vështira e masa të domosdoshme për ekonominë dhe për financat tona, rritjeje të të ardhurave falë rritjes së ekonomisë, tregtisë, investimeve publike e private, rritjes së prodhimit e të eksporteve, modernizimit të sistemit të mbledhjes së taksave përmes kompjuterizimit të transaksioneve në kohë reale, lehtësimit e rritjes së shpejtësisë së shërbimeve për biznesin falë digjitalizimit të tyre, forcimit të shtetit në tërësi dhe uljes së ndjeshme të korrupsionit në tatime e dogana, po mbi të gjitha, Pagat e reja janë frut i punës sonë të përbashkët, të çdo shqiptari e shqiptareje, që në shtet a në privat, kontribuon për ekonominë shqiptare me punën e vet”, shkruan Rama.
p.k\dita
