Kreu i Grupit Parlamentar të Partisë Demokratike, Gazment Bardhi, reagoi gjatë debatit në Parlament për buxhetin, në lidhje me deklaratën e Kryeministrit Edi Rama se pensionistët do të përfitojnë edhe një bonus të dytë në pranverë, përveç bonusit të fundvitit.
Në fjalën e tij nga foltorja e Kuvendit, Bardhi theksoi se Rama nuk ka parashikuar bonus për pensionistët në buxhetin e vitit 2025 për fundvitin e ardhshëm. Ai vuri në dukje se bonuset e premtuara nuk janë vjetore, por jepen vetëm këtë vit për efekte elektorale.
“Me pensionistët mendon se do t’i mashtrojë duke ndarë një buxhet minimal, duke u dhënë bonusin e fundvitit që e japin të gjitha vendet e rajonit. Bonusin e fundvitit e japin të gjithë vendet e rajonit dhe vendet evropiane në shenjë solidariteti, çdo vit. Ndërsa zotëria e bën njëherë në katër vite. As bonusin e fundvitit nuk e ka vjetor. Prandaj në buxhetin 2025 nuk parashikon bonus për fundvitin 2025, sepse nuk ka ndërmend t’ia japë. E dha në 2020 për efekt të zgjedhjeve 2021. Po e jep në 2024 për efekt të zgjedhjeve 2025. E ka dhënë edhe në vitin 2016 për efekt të zgjedhjeve të vitit 2017 dhe mendon se me këtë politikë do të gënjejë shtresën më në nevojë, shtresën e pensionistëve. Një kryeministër i përgjegjshëm do të duhej të vinte këtu dhe të tregonte sa është fondi në buxhet për rritjen e pensioneve për vitin e ardhshëm. Dëgjoi ndonjë qytetar sa do të jetë rritja e pensioneve? A tha ndonjë shifër që ka parashikuar rritje në buxhet? Jo, zero!”, tha Bardhi.
j.l./ dita
