Rama takohet me Kasanof, diskutohet mbi transparencën në drejtësi Zëvendës Ndihmës Sekretari i Shtetit, Alexander Kasanof, dhe Kryeministri Edi Rama u takuan sot në Tiranë për të diskutuar mbi partneritetin e fortë midis Shteteve të Bashkuara dhe Shqipërisë, duke rikonfirmuar angazhimin e përbashkët për arritjen e qëllimeve strategjike.
Në një njoftim të ambasadës amerikane theksohet se në fokus të bisedimeve ishte mbështetja e Shqipërisë për çështje kyçe shumëpalëshe dhe përparimi i saj në rrugën drejt integrimit në Bashkimin Europian.
Dy liderët shqyrtuan gjithashtu progresin e Shqipërisë në reforma të rëndësishme, veçanërisht në drejtësi. Ata theksuan rëndësinë e transparencës dhe të angazhimit të plotë për forcimin e sistemit të drejtësisë, një element kyç për përmbushjen e kërkesave të BE-së. Po ashtu, u diskutua për luftën ndaj korrupsionit, një sfidë e vazhdueshme për Shqipërinë dhe një prioritet i përbashkët, shkruan A2.
“Zëvendës Ndihmës Sekretari i Shtetit Alexander Kasanof dhe Kryeministri Edi Rama u takuan sot për të diskutuar mbi partneritetin e fortë SHBA-Shqipëri dhe mbështetjen e Shqipërisë për çështje kyçe shumëpalëshe, duke rikonfirmuar angazhimin e tyre për arritjen e qëllimeve të përbashkëta. Ata shqyrtuan përparimin e Shqipërisë drejt integrimit në BE, rëndësinë e transparencës në reformën në drejtësi dhe forcimin e përpjekjeve kundër korrupsionit”, njofton ambasada e SHBA.
i.b./dita
