Nuk kanë munguar paralelet e Dibrës dhe Himarës për vota elektorale, në pyetjet e gazetarëve ndaj kryeministrit. Rama i është përgjigjur pyetjes nëse përgjimet për Belerin kanë marrë tjetër trajtim nga drejtësia, në raport me përgjimet e Gjiknurit dhe Manjës, për blerjet e votave në Dibër, dosje e koduar si “339” dhe e mbyllur më pas nga Krimet e Rënda e SPAK për mungesë provash. Rama tha se kanë zero lidhje.
“Ky është silogjizëm ekstravagant sepse s’kanë lidhje rastet me njëri-tjetrin. Tjetër të dalësh duke folur në përgjim dhe tjetër gjë që të provohet se përgjimet janë kthyer në akte. Ato përgjimet që i referoni ju nuk kanë lidhje fare zero. Ka pasur shqetësime, sepse u bënë ditë që po i dëgjojmë shqetësimet e shprehura nga po ata që i kanë shprehur gjithnjë pasi janë ballafaquar me humbjen. Por çështja është nga kjo tek provat dhe tek shprehja e autorëve të raportit është hendek shumë i madh. Ka pasur shqetësime, po pastaj? Këto zgjedhje janë sheshit, me të vërtetën e tyre dhe që e vërteta e tyre është se ne kemi marrë besim shumë të madh, me një mbështetje si asnjëherë më parë si forcë politike… Pra ta shohësh ndryshe këtë, do të thotë të jetosh në realitet tjetër”, tha Rama.
