Kryeministri Edi Rama ka deklaruar gjatë një interviste televizive se ka zgjedhur që në fushatë të përdoret imazhi i tij dhe jo i kandidatëve për shkak se në media nuk gjendet shpesh herë hapësirë për ta.
“Ky është një dimension i këtyre zgjedhjeve që nuk mund të neglizhohet sepse nuk është thjesht një çështje, do shkojmë aty, do të zgjedhim një kryetar bashkie dhe patjetër kur vjen puna në nivelin e zgjedhjes së kandidatëve, kandidatët bëjnë fushatë çdo ditë në të gjithë cepat e bashkive të tyre, drejtuesit tanë politikë bëjnë fushatë çdo ditë në të gjithë cepat e bashkive të tyre dhe natyrisht flasin shumë për çështjet e komunitetit, por ato zënë pak vend në media,” – u shpreh Rama komentoi ecurinë e fushatës dhe premtimin për një fushatë modeste pa shumë shpenzime.
Rama mohoi se ka organizime të mëdha për fushtatën duke u shprehur se nga pikëpamja e kostove e ka mbajtur fjalën e dhënë.
“Fushata është modeste nga pikëpamja e shpenzimeve, shumë më modeste se në të shkuarën. Ishte e ndarë në dy faza, një fazë e parë pa takime të mëdha, takimet kanë qenë të gjitha shumë spontane. Tani është faza e takimeve përmbyllëse që janë takime të mëdha, por përsëri nuk ka tribuna, ekrane, shpenzime të mëdha, kështu që faktikisht, ajo që e bën mbase të duket shumë e madhe si fushatë është prania e njerëzve, nuk ka asgjë të madhe nga pikëpamja e shpenzimeve,” – u shpreh Rama.
m.b./dita
